pag. 20

A tola, la matina, na sospresa:
a xe rivà i Danieli, co l'intento
de farghe conpagnia, senza ofesa,                           3

ai quatro cavalieri: qual bon vento ?!
La xe na idea fantastica, sicuro,
cussita la tribù la xe on portento.                              6

Par evitarghe on giro massa duro
e farghe onore ai du che riva 'desso,
a vien studià on parcorso come el buro.                    9

Partenza, come senpre xe sucesso,
al'ora stabilia dai consilieri
dopo ver fato ben sgiozare el ...sesso;                   12

jornata on fià fumosa, come jeri,
ma ai tosati no gh'inporta on figo
parché i xe ciapà da d'i pensieri                               15

che'l tenpo, come sia, no'l xe on'intrigo.
Ciapà on steratin vegro de sassi,
ma dolze de pendenza, on'amigo,                           18

                          boaza 'pena pensà...

i riva - dopo solo pochi passi -
dessora on prà, co tanto de boaze
messe lì parché i fiuri vegna grassi.                         21

Bisogna 'ndar'in mezo a ste robaze
zercando de schivarle, e 'ndar zoso
stando 'tenti ae buse, anca: caze!                           24

"Xe tuto bon..",  e Renzo 'l xe on bon toso
che'l juta tuti quanti volentiera,
sicuro, atento, forte, corajoso,                                 27

2 - i Danieli = Daniele B. e Daniele T.
9 - come el buro = tènaro, facile
12 - sgiozare el sesso = pissare
24 - caze = come dire azidenti
25 - Xe tuto bon = indicazion de Renzo sol stato del sentiero

                                                                               
                                                                                pag. 21

ma 'l fà finire 'l Mestro so na piera;
la bici fà caolieva, 'l toso cade
ociandose na merda, lì par tera.                                3

El sente so la vita on par de spade
e fin che elo cria,  ride Leonardo,
come se'l ghesse visto di'e troiade:                            6

la man del Mestro xe finìa so'n cardo,
e intanto staltri zinque se godea
ridendo (rima dupia) co Leonardo.                             9

                    la tac del Mestro dopo l'urto

Dopo finìo 'l sentiero, se vedea
rumare in lontananza on nuvoloto
e intanto el poco sole se perdea                               12

assando 'l posto a calche petoloto
de càvara locale, fra la jara,
la stessa che ghe dà on remenoto                           15

ai lunbi de Renato. La fumara,
nel mentre, se tajava col cortelo
e ogni curva jera na bocara,                                     18

                    Bìscaro, poco prima de...

co na salita che portava in zielo.
"Xe morto Bìscaro, al'ospedale...",
cantava intanto 'l coro del Portelo                           21

ronpendoghe, malefico, le bale
al desgrazià che'l ghea on dolore boja,
inveze de tirarghe su 'l morale.                                24

5 - ride Leonardo = e de gusto anca, senza preocuparse de ciamare el 113
9 - co Leonardo = crisi de solidarietà ...co Leonardo
15 - la stessa che... = colpa dela jara, el Mestro slita co la roa ciapando on strapo
21 - Portelo = nota contrà de Padova, piena de PUTANE...

                                                                                pag. 22

Ala Casera, Renzo ghe vien oja
de farghe al grupo na fotografia
- e quando che'l decide che la foja                             3

se muova, el ne fà na litania -
cussì s'à fato, ma co chel fumaron
no pole decifrarla gnan la CIA.                                   6

                  foto ricordo

Se vedarà, sicuro, el cavaron
piantà co le so zate sola strada
par tèndare da lì ogni canton,                                    9

essendo 'l solo mas-cio di'a contrada.
Fra tanto, 'l vento spaza via 'l caligo
fin che'l cartografo l'è lì che'l bada                          12

al straduolo che'l metarà in castigo
i siè conpari e tuta la so boria;
"Xe tuto bon, in du minuti 'o sbrigo",                       15

a spara Renzo, senpre 'a stessa storia,
e staltri drio, prunti par scanarse
par far figura, par cantar vitoria.                             18

A dire ben, al primo presentarse
el sentiereto parea pericoloso,
ma dopo, el tenpo de abituarse,                               21

se stava in sela, 'n modo decoroso.
"Xe tuto bon", zigava 'l sior Narenti,
sicuro, atento, forte, corajoso,                                     24

1 - Ala Casera = la Casera Valfredda, parona dele càvare e del cavaron
4 - el ne fà na litania = el va de longo
11 - spaza via 'l caligo = spaza via la fumara
13 - straduolo = el sentiero 985                     

                                                                                pag. 23

pronto e disposto senpre a far contenti
i zinque marajuni dela banda.
"Atento !", "Cossa xe?", "S'à roto i denti..." :          3

la jera na caena dela Standa
e la s'à roto, oramai ala fine,
quando ch'i ghea ciapà na bela anda.                       6

El caro atrezi, pien de tanpeline,
se fà inavanti, pronto co l'argagno
cavà da on borselin co le sbarine,                              9

el socorso ACI

e 'l personale, co le man 'fà on ragno,
in du minuti 'l gà rimesso in sesto
la caenela, senza usare stagno.                               12

Fin ch'i laorava xe passà on foresto
"da Pontevigodarzere", 'l precisa,
che'l ghea raquanti funghi drento a on zesto;       15

l'aparizion de l'omo xe coincisa
col fato che xe vegnù fuora el sole:
"jera ora", fà l'omo di'a Marisa,                               18

par farse perdonare le so gnole
che le ga procurà pensieri e strazio.
I du Danieli, senza far parole,                                   21

i vuole far ricorso al Tar del Lazio
parché se uno fora, sto balengo,
bisognarìa che po' 'l paghesse 'l dazio...                 24

4 - caena dela Standa = roba dela mutua, da pochi schei
6 - na bela anda = na bela andatura
9 - borselin co le sbarine = borselin pien de roba, stufinà
18 - l'omo di'a Marisa = Renzo