pag. 1  pag. 2  pag. 3  pag. 4  pag. 5 

          

    Tomaso se ne incorze de vere oncora indosso le braghe dela tuta e dovendo cavarsele, el aprofita dela sosta par vèrzare la cànola e molare el pocio che lo sgionfa.
    Manovra nuova: el pissarolo el vien passà par soto la braga sinistra, rodolà aposta verso l'alto, e po' tirà in vanti parché no se bronba le scarpe.
    Sucesso fulminante, tanto che anca Oscar e Renato, confessando che no i jera pì boni de tegnerse, i se prova a fare come staltro, ma co manco bravura.
    Oscar se inventa na variante: el lo fa dala parte destra.
    A Renzo no ghe scanpa.   

    "Ca magnemo on pometo?"
    Si.
    La consumazion ghe piase anca a Renzo, che'l spera so l'efeto purga del pomo, visto che el Chi-Kung no ga fato on gran che.
    A sfrutemo el tempo par butare l'ocio zo, so la vale fonda e streta che ne sta soto, dove che se vede on presepieto de casete ingrumà torno a na ceseta.
    "Movémose, par piazere", piagnucola Oscar vardando in alto, anca se ormai el cielo xe za squasi tuto celeste.
    Riprendemo a scalare la strada che la va drento e fora dal bosco.
    Finisse el bosco e la strada la traversa on prà; intanto in alto se vede quelo che resta del forte, almanco ne parea.

    El tenpo xe on spetacolo e tuto el resto anca.             
    Tenperatura anbiente.
    El Mestro ga fame, ma Renzo dà ordene che no se magna prima de on boto.
    Tuti d'acordo ?
    No, ma intanto no se magna.
    Rivemo soto i veci muri che se vedea da soto, ma no'l xe el forte: quelo xe poco pì vanti e questo jera l'alojo d'i ufiziali strongàrici.
    Oscar cacia on zigo: na marea de lampuni, russi e fati, pronti da magnare.
    Scorpaciata: ne magnemo na spanzà paron e dopo se rimetemo in sela fin al forte.       
    Dirghe a Renzo che i lampuni i xe astringenti la xe sta na carognada.   

    FORTE DOSSO DEL SOMMO, a m 1.670 de alteza de montagna.

    Na bestia! Chilometri cubi de cemento, mucià dai Strongàrici oncora prima dela prima guera, prima che i Taliani i rivesse prima de ili...
    Ghemo fato ben a farghe guera a sti malgualivi malfidenti.
    Xe on boto passà, magnemo e po' montemo a cavalo verso staltro forte, che da qua el se vede.
    Ghe xe on sentiereto tremendo, na scalinà strongàrica co na scaneladura par la bicicreta e po' na dissesa da sbalo, co on stapionbo par parte, larga ma bruta da védare.
    Renzo se buta, el Mestro ghe prova a piè, Oscar no vole savérghene e Tomaso fa come Renato.
    Ma la xe curta e la porta subito in strada, vizin al Bus de la Nef dele Coe.
    Dopo gnanca zinque minuti rivemo al FORTE SOMMO ALTO, nantra òpara de prima dela guera, fata in vista dela guera, a 1.613 m.  
    Questo se pole visitare e lo visitemo, anca se el tenpo no xe pi belo come prima: tira na bava che taja le recie.
    Renzo jura che sarà bel tempo fin a vènare.
    El Mestro jura che no piovarà prima dele zinque.
    Oscar jura che bisogna far presto par no catarse in mezo a on tenporale.
    A Tomaso no ghe ne frega gnente e 'l se vestisse mejo.  

    Visitemo el forte e po' se butemo in dissesa so nantro carezon de montagna che'l se tufa subito in mezo al bosco. Renzo core vanti, come al solito, ma par fortuna ghe xe Tomaso che tira indrio, cussì la va a finire ca sbagliemo strada e rivemo al Passo del Sommo inveze che al  Forte Cherle.
    Come dire Stanghela inveze de Calaon.
    Oscar xe deciso a ndare a casa (albergo, n.d.r.), senpre par l'idea dela piova.
    Gnente paura: na ociada ala cartina e catemo subito nantra strada. Oscar se adegua.  

                                   A sto mondo bisogna desperarse, inrabiarse o adatarse

    "A queste dovìvino rivarghe", dise Renzo co filosofia.
    'Ndemo su par 3 Km. drio la sfalto e po' ciapemo na salita càncara, in mezo a on bosco belo che mai.
    No ghe xe pì segnali e cussì ne toca 'ndare a naso, sperando che la cartina ca tiremo drento e fora dal zaino de Oscar la ne juta.
    La ne juta!
    Dopo na dissesa spetacolare in mezo a nantro bosco senpre pì salvadego, rivemo sui ruinazzi de on vecio ospedale militare strongàrico.
    Da lì, na scalinà streta e longa che no se ne vede la fine la va zo fin la strada (la scalinata dell'Imperatore, cosideta).
    Noantri 'ndemo zo par el sentiero e, traversà la strada sfaltà, ciapemo su par nantro sterato, fin al FORTE CHERLE  ( 1.445 m. ).    

    On tafanario enorme, anca questo, squasi intato, pien de busi retangolari par le mitràlie, che ti no te le vedivi e ele te copava.
    Magnà e spanto aqua, zerchemo el sentiero del ritorno par quasi mez'ora, ma gnente da fare: manca segnali e la cartina no parla.                                                                                                           

                                                        Carta canta e vilan dorme

     Xe ormai le 4 e tri quarti, el tenpo tànbara e Oscar el sta sui spini:
    "Xe ora ca 'ndemo casa, no vedì che Tomaso xe coto?"
    Anca staltri.
    Partiemo, dopo verse portà sola strada sfaltà, quela che vien zo da no saemo ben dove, e in gnanca diese minuti e 7 Km. a semo al Passo del Sommo.
    Se fermemo a tirare el fià e spetarse tuti, davanti ala ceseta del Santo "protettore dei Forestali".
    Ale zinque in broca la pelada de Renzo sente na joza. Oscar do:
    "Lo ghea dito, mi", gongola el Mestro.                                                                             

                                             Santi che pissa in tera no ghe n'è...

                     Alora la xe piova.
                     Via de corsa a Folgaria. Tri minuti, gnanca.
                     No piove pì, ma ghemo fato instesso 50,930 Km.
                     Le bicicrete e le ganbe le xe sporche pì de boazze che de altro, ma semo contenti come dele pasque.
                     E ghemo fame, ma par quela bisogna spetare le 19.30, par òrdene del cuogo.
                     Par mazare el tenpo 'ndemo a Rovereto in machina, dopo la docia se intende.

                     El Mestro ga bisogno de scarpe.

                                                                                                                                                  Torna su...