pag. 1  pag. 2  pag. 3  pag. 4  pag. 5 

 GIRO DEI FORTI  N. 2

                                                       MARTI, 3 Setenbre 1996

    Stamatina xe on tenpo da lupi.
    E chi se ne frega. 
    Muso duro e bareta fracà, dopo el ristoro de prima matina se metemo in strada.
    Ghemo da fare staltri zinquanta Km. dei Forti.
    " Na odissea", dise Oscar za preocupà.
    'Ndemo verso Costa, par traverso canpi, drio na stradeta sfaltà che traversa na zona piena de vilete singole par na fameja sola, tute torno a on santuario dela MADONNA DELLE GRAZIE.
    Proprio davanti ala cesa taca a piovisinare.
    Cidenti.
    'Guai fermarse!

                                        Le montagne sta ferme, i omani se move      

    No inporta: ne assemo vegnere on poca e dopo se rimetemo in sela,
ma ghemo apena el tenpo de rivare ala ceseta del Santo d'i forestali.
    Che par fortuna la ga on portegheto sol davanti, cussì podemo metarse ala remocia.
    Fin ca spetemo becolemo calcossa. 
    La piova, intanto, la deventa depì, ma in conpenso pì fina.
    De quela che te nega in du minuti.
    Dopo mezora el consilio parochiale decide de farla finìa: o se va vanti o se torna indrio.
    'Ndemo vanti.
    No, tornemo indrio.
    Tornemo indrio.
    No, 'ndemo vanti.
    Dopo arquanti tira e mola se butemo in dissesa, ben cuerti, e co la coa in mezo ale ganbe femo tapa in albergo.
    Che narvoso!
    "Doman 'ndemo casa", dise Oscar, bronbo come na sepa.
    "Gnanca par sogno", dise Renzo, bronbo come na sepa.
    "Vedaremo", dise Renato, bronbo come na sepa.
    Anca Tomaso xe bronbo come na sepa.

    Oncuò riposo

                                GIRO DEI FORTI  N. 2

       TENTATIVO  N. 2

                                         MERCORE, 4 Setenbre 1996

    Verzemo el balcon tremolando, par paura che gabia rason Oscar.
    Oscar no ga rason ! Viliaco instesso.
    El tenpo xe come ieri, ma manco biso.
    Soluzion: spetemo dopo le diese par partire, chissà che intanto el tenpo nol vegna mejo.
    "Si", dise Tomaso, "basta che no resta belo fin mezodì e che dopo piova".
    Parlamadona.
    Fata marenda, femo du passi in paese, par darghe on fià de vita.
    Man man ca caminemo le nuvole se slarga e le ghe assa posto al celeste.
    Chi che ga dito de spetare le diese?
    Tuti.
    Par anticiparse femo spesa prima de montare in bicicreta.
    Ale diese e meza in broca montemo a cavalo e partiemo, dopo verse fotografà tacà ala panchina del Guinnes de Folgaria, col tenpo che ormai xe belo squasi del tuto.  
   "Mah..."

    "Tasi, Oscar...", sbèrega Tomaso.   

    Semo contenti anca par la situazion del pantazo de Renzo.
    A furia de magnare ghe jera el pericolo che'l deventesse na fossa biologica.
    Manco male che'l s'à libarà, anca se dopo quatro dì e in cressire de luna.
    " A queste dovìvino rivarghe ", xe el comento del'interessato che intanto el ghea ciapà colore.
    "No te sarè mina stitico?...", ghe domanda Tomaso  

                                            A ogni culo el so cagare...

    Manco male.
    Partiemo de fuga verso SAN SEBASTIANO, sola strada par CARBONARE.
    Trasferimento senza storia, prima in salita po' in dissesa so strada sfaltà.
    A San Sebastiano incrosemo el toco alto del parcorso dela 100 kM DEI FORTI, ma sol giro de quatro spedalà perdemo i segnali.
    Cidenti, tre volte.
    Drio el parcorso dovarìa essarghe on paleto co na frecia aposita.  

                                           100 kM dei FORTI

    Difati. Pena ca lo vedemo ciapemo el stradoleto justo.
    Streto e in dissesa, col panorama verso Carbonare.
    Par no perdare tuti i minuti contà, visto ca se ghemo perso oncora, dopo on'ociada ala cartina in dotazion, decidemo de tajare drio la strada sfaltà, ca no 'ndare a ingrejarse in mezo a on prà che, paraltro, no semo gnanca boni de catare.
    Tanto la xe tuta dissesa.
    Suito dopo Carbonare catemo oncora el segnaleto che'l ne manda su par on carezon, verso na malgheta poco distante.
    " Va vanti ti, Mestro", incoraja Renzo, visto che no la xe dissesa...
    Ala casa, tendù da do montanare e on montanaro che i tegnea de ocio anca na destirà de patate rosse, l'omo ne dise, prima ca parlemo, che el segnale lo cataremo pì vanti.
    "Grazie, signora".
    Oscar xe on toso de sesto.
    Catemo el segnale, so on bivio de du sentieri misti de erba e sassi, in salita.
    Dopo zinquezento metri nantro bivio, ma gnente segnale.
    'Ndemo a ocio, e a naso, squasi a palpeto vardando le peche dele vache.
    "A intuizione", dirìa Carlo Celio.
    Nonostante i zighi de Renzo, che'l vorìa tajare a destra al bivio pì vanti, anca quelo senza segnale, el Mestro ordena de 'ndare driti.
    A sinistra ghe xe massa salita.

                                 ...Dove che va l'ago va anca el filo.  

    El bosco xe belo, le boazze grande, on saco de raise, ma dopo on fià bisogna tornare indrio: massa crosare senza paliti che segnala.
    "Forse te ghivi rason ti, Renzo"

                                                                                                                                                  Torna su...