Canastrèi in forno
                 

_________________________________________  torna indrio

          

Par quatro che magna

1 chilo de canastrèi in capa (se serve par antipasto). 2 chili se serve par secondo
2 ramete de parsìnbolo tridà fin
2 spighi de ajo
2 sculieri de pan gratà
Calche sculiero de oio stravergine de oliva
pévaro e sale

         Se fa cussì:

  1. Vèrzare le cape assando tacà da na parte la bestiola *

  2. Lavare par ben soto el rubineto (ghe xe sabia...)

  3. Fare scotare l'ajo so l'oio fin che questo ciapa gusto

  4. Métare le cape so na tecia da forno, po' - so ogni una - métare on pizegheto de pan gratà, calche jozza del'oio insaorìo co l'ajo, pévaro, sale e on pizegheto de parsìnbolo.

  5. Métare in forno a 200 gradi par zinque minuti (no depì, senò se seca tuto...)

  6. Magnare caldo  
NOTA: chi che ga dele cape sante vode, el pole fare la stessa roba metendoghe on paro de canastrèi so ogni capa. I xe mejo dele cape sante!

* NOTA 2: Se le bestiole no xe fresche, no le xe tacà. Questo xe na drita del me amigo Oscar.