torna indrio

A só zo de corda e sò parché;
ma no só bon de parlarne,
no me riesse de sberegarlo al mondo.
La vita che me xola torno 
la xe drio stuzegarme,
on fià massa,
la me rezerca drento, 
la me branca el cuore e la lo struca,
la ga solo oja de zugare
co la me ànema;
no sò se la colpa xe mia,
no credo, 
spero de nò,
ma sò de sicuro che la insiste,
la vita, a tegnerme so la corda.
E mi go paura
che la se stufa de xolare
e che la se cala dessora de mi, 
come che la ga fato co me fradèi.
Se dovarà sucèdare,
vita,
speta almanco 
ca te conossa del tuto.

Sessant'ani li go squasi ciapà,
'nantri sessanta no me serve.
Na via de mezo,
vita,
cossa dito?

2008