Fileto de trota
ala pacanina                 

_________________________________________  torna indrio

          

Par quatro che magna

 
4 trote da 3 eti l'una
1 zeola bela grossa
2 carote
on mazeto de parsìnbolo
2 sculieri de oio stravergine
1/2 goto de vin bianco (o de bira)
1/2 pevaron rosso



         Se fa cussì:

  1. Lavare par ben la trota, tajarghe la coa e la testa e tajarla in modo da fare du filiti e scartare el spin; ma va ben anca tochi intieri...

  2. Tajare e tridare la zeola, la carota e el parsìnbolo e metare tuto so na bela paèla larga co l'oio, a fogo basso e, dopo on par de minuti, el vin bianco, fin che questo svanpisse tuto;

  3. Metare in paela i filiti de trota, pozandoli dala parte dela pele;

  4. Spanpanare sola paela el pevaron tajà a strissete e justare de sale e pévaro;

  5. Assare che se cusina pian pianelo, col cuercio, girando i filiti solo par i ultimi du-tri minuti; ste 'tenti che el pocio no'l se seca: se sucede, slongare co on fià de vin bianco;

  6. La Pacanina, me mama, che se ga inventà sta maravéja, la dise che 'ndaria ben na polentina de farina bianca. Vardè valtri.