Supa carne e verdure
                 

_________________________________________  torna indrio

          

Par du che magna

2 bisteche de manzo, tajà fine
50 grami de spaghetini fini, roti ala misura de 2-3 zentimetri
1 zeola (mejo rossa)
1 ganba se sèlino (senza foje)
1/2 pevaron (rosso o zalo)
1 carota bela grossa
2 spighi de ajo
3 sculieri de oio stravergine de oliva
1 sculiero de farina
1/2 goto de vin bianco
aqua, pevaro e sale



         Se fa cussì:

  1. Bàtare par ben le bisteche e tajarle a sbrìnzoli de 2-3 zentimetri par lato

  2. Tajare a fetine la carota (no massa fine...) e el pevaron

  3. Tajare al'ingrosso anca la zeola e el sèlino

  4. So na paela larga farghe ciapare colore al'ajo, po' butarlo via

  5. Butarghe drento la carne e farla girare du minuti a fogo vivo

  6. Butare drento le verdure e farle saltare tri minuti

  7. Butare el vin e farlo svaporare

  8. Zontare 1/2 litro de aqua de bojo, justare de sale e pévaro e assare sol fogo 7-8 minuti, col quercio

  9. Butare a piova la farina smissiando par ben (atenti ai coari, che i sarìa i grumi) po' butare la pasta e assare che la se cusina (3 minuti). El brodeto vegnarà fisseto, par via dela farina (atenti a no métarne massa...)

  10. Servire de bojo, infromajando par ben