Risoto co i scrizioi
opure co i bruscandoli                 

_________________________________________  torna indrio

          

Par quatro che magna

 
4 eti de risi (vialon nano)
2 bei maziti de scrizioi o bruscandoli
2 spighi de ajo
1/2 zeola
oio stravergine de oliva
4 sculiarà de grana gratà
pévaro e sale, quelo che serve

         Se fa cussì:

  1. I scrizioi in talian i se ciama "stridoli" e in dialeto anca carleti. La xe na "pianta erbacea spontanea" che la cresse drio ai rivali; se usa i buti (germogli) e la se cata da aprile a majo. I bruscandoli i xe i buti del "luppolo selvatico", on "rampicante" salvadego che cresse drio i fossi assà incolti; i se cata anca drio la ferovia. Stessa stajon d'i scrizioi.

  2. Chi che ga la fortuna de catare ste erbete tacà a casa soa, ben, senò i le vende.

  3. Fare on desfrito co la zeola e l'ajo (che dopo el se cava);

  4. Butarghe drento le erbete zicolà par ben e assare scotare par du-tri minuti;

  5. Butarghe drento i risi e menarli torno a seco par on par de minuti, po' cusinare come tutti i risoti co del brodeto vegetale liziero;

  6. Ala fine  stuare el fogo e butarghe drento in pignata el grana, menando in pressa par on minuto par maltecare; justare de sale e pévaro;

  7. Metare sol piato, infromajare par ben e magnare (col grana dela fromajera...);

  8. A sento el profumo anca solo a scrivare...
P.S.: Se inveze d'i risi se buta in tecia d'i ovi sbatù, vien fora na fritaja da lecarse i bafi.