Risoto co le rane
                 

_________________________________________  torna indrio

          

Par quatro che magna

 
4-5 bele rane a testa
4 eti de risi (vialon nano)
1/2 zeola
1 spigo de ajo
1 costa de sèlino
1 carota
1/2 goto de vin bianco
30 gr. de butiro
3 sculiarà de grana gratà
1 mazetin de parsìnbolo, pestà fin
4 fili de erba cipolina, pestà col parsìnbolo
sale e pévaro, quelo che ghe vole
oio stravergine de oliva, 1 sculiero

 

         Se fa cussì:

  1. Le rane zerché de catarle za pelà e curà, parché el saria on laoro antipatico... Mi le cato in pescaria.

  2. Pestare ben carota, sèlino e zeola e fare on bel desfrito co l'oio e metà del butiro;

  3. Fato el desfrito, butarghe drento le rane, intiere, e farle 'ndare a fogo vivo par du-tri minuti;

  4. Bagnare co metà del vin bianco e portare a cotura le bestiole, zontando - se serve, che no se taca - on fià de brodo de dado;

  5. El laoro pì fastidioso: cavàre le rane e tirare in parte tuti i ossiti, che resta solo le polpetine (no ste magnarle fin ca fè sto laoro, senò restè senza pa'l risoto!);

  6. So on piato, co na forcheta pestare le polpete (se podarìa darghe na frulada, ma cussì le resta on fià solide);

  7. Metare oncora la carne insieme col so toceto de cotura, butarghe drento i risi e far saltare a fogo vivo, bagnando co staltra metà del vin bianco;

  8. Cusinare come on risoto qualsiasi, co del brodeto vegetale liziero (aqua, meza zeola, na carota, na costa de sèlino, sale).

  9. A fine cotura butarghe staltra metà del butiro, el grana el parsinbolo e l'erba cipolina, menando torno a fogo stuà par du minuti;

  10. So la fotografia se vede del verde dessora: el xe lì solo par beleza, ma sa volì...! Se vede anca che a mi me piase magnarghene on bel piato!

  11. Finalmente se magna!
NOTA: me nona ghe piasea metarghe anca del pomodoro in pignata fin che se cusina le rane, ma secondo mi el ghe tole gusto ale rane, che le xe delicate.