Orada al forno
                 

_________________________________________  torna indrio

          

Par quatro che magna

4 bele orade fresche da porzion
on limon
3 foje de salvia, 3 de aloro e 1 rameto de  osmarin
3 sculieri de oio stravergine de oliva
on sculiero de origano
2 spighiti de ajo
3 sculieri de aseo
sale e pévaro

         Se fa cussì:

  1. Curare par ben le orade, cavandoghe anca le scaje

  2. So na bela tecia da forno, métare a scaldare l'oio co la scorza del limon tajà a fetine fine, l'osmarin, la salvia e l'aloro

  3. Co' l'oio xe caldo, butare in tecia le orade e farle rosolare parte par parte

  4. Métare la tecia in forno a 180 gradi par diese minuti, zontandoghe l'ajo

  5. Cavàre dal forno e bagnare co l'aseo e spolvarare le orade co l'origano, justando de sale e de pévaro e tirando via l'ajo

  6. Métare oncora la tecia on forno par 'nantri diese minuti, bagnando el pesse on par de volte col toceto

  7. Servire dopo 'vere spolpà co passienza le orade (zercando de no desfregolarle tute), passà co onfileto de oio cruo

  8. Conpagnà co na bela salatina fresca de stajon le xe on spetacolo