Ocricchio

ANCA la seconda matina ghe xe fumara. Speranze bone. In sala consumo se magna de tuto. Se pole avere on capucino? E come no! Mi me piaxe el cafè de orzo... Nun c'è probblema! Questo xe capirse. Ale nove e meza, su par zo, inpenio i zaini de banane e perseghi - gnente panini, come da riceta del dietologo de turno, par paura de intasamenti —el mucio se mete in movimento, ala zerca dela Porta del Colle. Catà sùito la porta, ma girà a destra inveze che a sinistra col risultato che la procession se ingruma. Rimesse aposto le carte, el corteo ciapa

stavolta  el cao justo, anca grazie ale indicazioni de on tenico dela Telecom. La strada, secondo le carte, la xe praticamente piana, prima sfaltà - ma deserta - po' rota, e la passa in mezo ai canpi, fra do ale de passaja o de àlbari de ròare. L'omo dela Telecom ghea fato na lezion de storia, contandoghe ai scolari che quela la jera la strada romana che traversava la piana. Dopo zinquanta metri dala partenza a ghìvino za inparà calcossa.

In siè sete chilometri la pianura finisse e la strada, passà anca in mezo a on paro de borghiti de canpagna co zinque case l'uno, la se buta in salita in mezo a on bosco de ròare. Sfaltà, ma deserta, el che ne fa pensare che la porta in calche posto desperso. El primo batistrada, rivà in zima ala salita e ala fine dela sfalto, a on incrocio el domanda a on toso in moto: dove xelo el paese? Quale paese, signò? Nun c'è nessun paese. Ocricchio... Ah, Ocricchio. Dopo la curva! Questo 'ndaria ben a fare el postin in centro Padova, dixe Claudio, bituà a catare on canpanelo da sonare ogni passo. A dire la verità el paeseto - Ocricchio, par la cronaca - el xe na piazeta circondà dala cesa e da tre case. Tuto rimesso a nuovo. Dopo el teremoto del '79, dixe na siora che la jera pì contenta s'i ghe assava la casa vecia. Na sosta al'onbra, visto che el sole, parà via la fumara, adesso el scladava le recie. La comitiva jera drio 'ndare via quando che el silenzio del paesetto xe sta roto da na stronbazada. E' lu furnaru, dixe na veciota. Rivelo senpre a sta ora?, domanda Giuliano, intaressà al giro e pensando al plateatico. Sì, senpre alla stessa ora, ogni qunidici giorni, signò! El lo ga contà dopo, parché intanto el grosso dela trupa jera za partio. Da lì scumizia el sterato e anca, secondo la carta, i pantezaminti.

LA SALITA se fa dare sùito del vu e xe inùtole sperare che la canbia.Lo dixe la carta stessa. El sterato no xe proprio malmesso, ma el fondo ga d'i sassi smossi e quili che no xe smossi ghe pensa el petomane del gruppo a cavarli co arquante sbrufade dal tubo de scarico. Ogni tanto la pendenza se inàlbora e la conpagnia se sgrana. Davanti, i soliti cagafati Giacomo, Giuliano e Claudio che se ranpega senza che la fadiga se veda. In mezo e dedrio la fadiga fata persona, che l'età ingrandisse senpre depì. La fadiga, ma la oja xe senpre zovane! A ogni modo, dopo arquanti strapiti da sbochi, anca i tori ghe toca sbassare i corni e farse on trato a piè. Par giustificarse, Giuliano tira fora la canarina che gnanca Marinelo sarìa bon de farlo in sela: quarantazinque gradi, jara smossa e tera ismissià. Uguale caolieva. Fortuna che "tuto ga na fine, anca le galine" dixe el proverbio, cussì dopo on'ora de sforzi el calvario finisse e scumizia la penitenza. Infati, le carte dixe na roba ma sol monte ghe n'è nantra. Toca navigare a naso.

Inte sto nùmaro:

Salite càncare

Sentieri ingropà

I marmi de Cascia

Galeria senza luce