On zerto GiambattistaVico tegnea dito  che la storia se ripete. E qua el ga catà rason. A metà strada la protezion civile che tegnea le retrovie ga dovesto intervegnere par portarghe i oji santi al sfigaton dela jornata. Giuliano ga forà nantra volta! Co elo anca canbiare na camardaria xe on afare de stato, parché elo ga da vere on pipàjolo pì longo, come se ala Luciana no'l ghe bastesse normale. Operazion fata, sfiga vinta, la garavana riparte par la meta col pensiero de Lelo. Chissà che gabia rason Renzo.

I du taca za a vardarse so nantra maniera da quando ch'i sta insieme. No la xe na copia par forza, i s'a zernìo. Dormito co mi, Giacomo? Si, Luigino. E che contenti ch'i xe! I tuga anca a tola: ne voto na spironà? No, versame del vin. Ma gnente de male, eh! Cossa ghe xe de pì belo de du colunbi che se vole ben? Cossa ghe xe de pì dolze de quatro oci che se varda? Cossa ghe xe de pì caldo de on leto scaldà da du? Cossa ghe xe che fa pì schifo al cospeto del mondo? Cossa, eh?

No se sa mai cossa che ghe passa par la testa ala zente. Te vidi uno che core, ma no te sè se'l scanpa o se'l'insegua. Te vidi Lelo che'l magna pan prima de zena: che fame che'l ga! Maché! El ga scoperto che la fornara la xe on bel toco de banda e cussì el se sacrifica: par gustarse l'ocio ...na ciopeta de pan. El xe riussio a sacrificarse anca de note, parché el s'à insognà dela fornara e de tre coriere de invità par le noze.

Tri chilometri de patiminti. Questo xe sta la salita verso la Forca del Passo. Al grupo, sgranà par via che ogni uno ga na machina difarente, o parché - come Tomaso - el se canbia tre volte i panolini, o parché - come el Mestro - el s'a ciapà indrio a cacia de quaji, ga tocà viajare soto na piova che dio-la-mandava. 'Ndando vanti, par le ganbe i chilometri parea de astico e no i jera pì tri, ma quatro, zinque, siè... Specie i ultimi trexento metri, e i jera fati de aqua. Aqua par sora che la vegnea zo, aqua par soto che la corea in dissesa come on torente, aqua indosso che la ghea spassà el capauèi. In zima jera fredo, ma almanco fin che, man man ch'i rivava, i soldadi se vestia, la piova s'à tirà indrio, assandoghe el posto a on ventexelo jazà. Gnanca lì ghe jera Lelo. El sarà al rifujo Perugia. No, el xe 'nda vanti: Renzo sa senpre tuto. Difati Lelo no jera al rifujo dove che Tomaso, prima de tacare la dissesa, el s'a canbià nantra volta i panexei. Spetà par védare se el desperso se presentava, dopo verlo mandà in mona, i sete superstiti se mete de oja e i parte par la dissesa finale. Vintidù chilometri de fuga fin a Norcia, col garbin che tajava le recie a tuti.