Esplorazion istrutiva, visto l'incontro co i du vecioti (v. pag. 3). Oncora mastegando le lenticchie crue, Renzo ghe ricorda al protonzin che saria ora de montare in sela, ala volta del sterato. Qualo sterato?, se maraveja Tomaso. Dal piazaleto dela cesa el se vedea ben. Na stradela che se ranpegava sol monte davanti e che vista da lì la ghea tuta l'aria de essare cancara. Mai domi, ziga Renzo e tuti, mastegando chi na preghiera chi na torza, ga tacà a inviarse. Lelo jera za partio, come al solito. Sùito s'a visto chi che ghea magnà de gusto: Giuliano, Claudio e Giacomo i s'a butà a pesse ranpegando ala grande, col Mestro che, tentà de guantare la roa, el ga dovesto fermarse do volte par no spanpanare so la jara tuta la ueta pena magnà . De drio, par studiare mejo el da farse, se ghea riunio Luigino, Renzo e Tomaso. Gnente da dire, a ogni modo. La salita, almanco i primi trexento metri, la jera da sbochi e la stradela la parea bonbardà dai tedischi. Che on pochi, de tedischi, ghe ne vegnea anca zo in furgon o co zerte machine vecie. Tuti patii del'aquilon (parapendio, n.d.r.) ch'i 'ndasea sol monte par butarse basso. Intanto...

COME  se no bastesse la fadiga, man man che se 'ndasea suso el tenpo scumiziava a guastarse, par via che el Monte  Vettore jera drio cusinare on nuvoloto moro drio staltro. Come se no bastesse el tenpo, dopo tri chilometri de ànsimo e de palpitazion a mile, el grupo, fermà a racolta dal cartografo par vedare el da farse, el ga dovesto decidare de 'ndare oncora su dopo vere consultà la carta uficiale e anca quela de scorta. Le indicazion de na tedesca in dissesa disea che la salita jera oncora longa "...anca ze ich no zono stata in top, tu capire ya?...". Nein, frauleine. Come se no bastesse la tedesca, intanto tri aventurieri se ghea portà vanti, senza incorzarse che el sentiero el girava e portando la garavana fora orientamento.

EL BRANCO s'a fermà a magnare, preparando la tola sui scalini dela cesa del paeseto, che la xe intestà ala Madona Assunta, come quela de Suisin. Jera on sole ardente, ma tirava na baveta parfin dolze. L'unico che ga profanà la scalinà santa xe sta Leonardo, che'l ghe se ga destirà dessora a pèto nudo col sole petà in facia. On spetacolo da far gomitare la ueta e le mandole che el Mestro ghea portà fin là so na scatoleta celeste. Come zareseta sola torta, el frutarolo scandaloso el ga messo in fresca la boracia so la fontanela, tanto che parfin Tomaso se ga revoltà dàndoghe ordene de farla finia. Risposta: tasi ti, inbriago de on barista. Cussì tuti, par no darghene on purgo, xe partii a piè su par le stradete, par esplorare la contrà, assando che'l rivoltoso stesse là de guardia ai cavai.

Col vento contrario i zighi del Mestro e de Luigino no rivava a destinazion, cussì par nantro chilometro el xe sta on inseguento dela fuga. Fin che la strada la xe finia, de colpo. Dopo na curva el sterato s'a blocà incoste a on segnale de "divieto de transito", messo lì par i maurni che, anca vedendo che la strada no ghe xe pì, decidesse de 'ndare vanti. Co le prime joze de piova la giunta par le òpare de urgenza ga dovesto catare na soluzion. Na visita lanpo al cocuzolo poco distante, drio la tracia de do ruàre che se ranpegava, ga messo in ciaro le robe. De sentieri gnan l'onbra e de zercarne no se ne parlava. Cogna tornare indrio...