gni momento dela nostra vita ga bisogno de essare studià, par capire se tuto va ben, se calcossa va male, cossa che fa ben e cossa che fa male. Quando ca portè via in machina i vostri tusiti, ste tenti che no i gabia tolto del late prima de partire, o che no i sia a stomego vodo. E anca ocio ale curve, guidare senza scati ala risposta, senza celeruni inprovisi. Guai darghe panini co la mortadela e no montarli in machina, no partire se la sera prima i ga magnà spaghiti ala carbonara. Ghe xe senpre in aguato on disturbo schifoso, tremendo anca par chi  che no'l ghe vien: la gastronomia. Me spiego. Chi che no fa come ca digo mi, ca so on esperto gastrointerista del'ospedale majore de S. Eutizio da Preci, eco cossa che ghe capita. Montè el toseto in machina e pare che no'l gabia gnente. Ala prima fermata dal casolin, el bocia ve dirà che ghe da  fastidio l'odore de l'ojo, anca se'l xe sarà in butilia. Ala seconda fermata, par el piche niche, el bocia vole magnare on panin co la mortadela, ma el lo ingiutisse par forza. La terza fermata la xe quela che ve domanda elo, parché el ga za tacà a gomitare so la copa de quelo che ghe sta davanti che, pora ànema, el se incaza anche, co tute le

rason del mondo. El bocia fa la ziera zala, i oci da pesse straco e l'insiste de partire che elo no ga pì gnente.  La quarta fermata la vien dopo poco tenpo, e so quela el ghe inpenisse la borseta de so mama e le scarsele d'i sedili dedrio dela machina, ma stavolta el va anca de riòdolo, parché la gastronomia ghe ciapa anca l'intestino. La ziera deventa verde e so mama taca a criare che'l toso ghe muore lì parché no la 'o ga mai visto cussì. Me pare justo. No che'l toseto muora, ma che no'l sia senpre verde e co i oci roessà. Dopo la quarta fermata no ghe xe pì gnente da gomitare e alora ghe vien i suòri fridi, i papari viola e el taca a vedarghe turbio. Ma questa no xe la malatia, i xe i fumi dela gomitada. In machina no se pole pì starghe e anca l'autista ghe vien da fare olga. Anca sa fè quatrozento chilometri no ve bastarà parché el toso staga mejo, anzi. Al primo tentativo de desmontare dala machina le ganbete no lo tegnarà pì su, ghe girarà la caponara e le buele, come na camardaria voda, le deventarà na fabrica de aria che la canbiarà l'odore in machina, come l'arbre magique. Tuto questo podarìa sucedare sa no me scoltè  I tusi debole de stomego, butème mente a mi, assèi casa!