Petomane

Casella di testo: LA STRADA sfaltà in salita che porta suso verso Castelluccio ghe n'avarà da contare a tuti i turisti del secolo! Da metà in su, che sia sta par la fadiga o che sia sta el caldo o che sia sta el viajo del dì prima o la zena dela sera o che sia sta el sono trascurà opure i dispiaziri del laoro o che sia sta l'efeto di'a fumara de Norcia o del'odore de salado spanpanà par tuto el paese o che sia sta el cafè de orzo del bar in piaza o che la sia na peca de fameja o che sia sta el materasso massa morbio opure massa duro, fatostà che par na dozena de chilometri Luigino ga messo in movimento el conpressore interno stronbazando a ogni spedalà e spandendo drio de elo nuvolete de azoto invisibile che ga tegnù distante i sete conpagni de viajo. El bon senso che fa de elo na persona acetabile, lo ga sostegnù consiliandoghe ogni volta de fare on zigo de aviso, in modo che nissuni ghesse da catarse in traietoria. No'l ghea magnà fasuoi.

(continua da pg. 1). El tranbusto messo suso da Renzo e Lelo ghea fato pèrdare de vista i intaressi del grupo. A parte Lelo ch'el ga ordene de 'ndare in avanscoperta, pian pianin i du nuovi aquisti dela spedizion - Giacomo e Giuliano - i s'ea portà vanti, tentando la fuga senza verse prima consultà co i veci. On'ocià a Luigino e, so on colpo de man, el vecio leon ciapa e ferma i du vìscoli. Che no suceda pì!

- on turbo par la salita

- on visentin da Mantova

- na cesura fra i munti

- sece roesse sui corni

IN VETA al passo - che qua i lo ciama Forca del Piano - la solita sosta par tirare el fià, maravejarse de quelo che ga fato la natura so chel posto e po' fermare el solito pelegrin de passajo par farghe fare la fotografia a tuti. Xe sucesso tuto cussì. El pelegrin de passajo stavolta, el jera uno che parlava come noantri, o quasi. On visentin strapiantà dale parte de Mantova, in gita co mojere mantovana e fiolo metà e metà. La fotografia la xe quela chi in parte. La posizion incucià no promete gnente de bon par i difeti de Luigino. Mah !

Bisogna védare par credare. Rivare fin lì xe sta na fadiga del tuto acetabile: na vintena de chilometri de sfalto, senza trafico, co na vista continua so la vale de Santa Scolastica e Norcia senpre davanti ai oci. Bastava vardare zo. Ala Forca del Passo el sole scaldava, ma ghe jera na arieta frizantina che ga sujerio de metarse la jachetina. 1.478 m., tanto par la precision. La vision, da lì, la te assa senza fià. Te se para davanti, on fià in basso, na spianada che la pare no finire mai, tanto la xe grande. E tuto torno na corona de montagne che le pare messe lì in guardia. Na canpagna che el Mestro insiste a dire che la sarà zento chilometri quadrati, anca se Renzo no xe d'acordo. Vien el gropo in gola, e anca le maraveje te vien a farle soto ose par paura de ronpare l'incanto. Na vision che restarà incolà sola memoria de tuti. Parfin Lelo e Renzo fa la pace par senpre, e basta co le gare. Luigino lì dessora no'l sfiata pì, Claudio ghe piasarìa portare la posta fin lì, el Mestro ghe vegnarìa co la rulò e Giuliano col banco del marcà. Renzo no'l vede cuerti par le antene e Tomaso el xe contento che le piègore no le beva el cafè. Lelo xe senza parole e Giacomo, inveze, el pensa come contàrghio in spagnolo a so mojere.Tuti ride, co na lagrema par ocio.