TORNA’ indrio da S. Eutizio (par la cronaca, i jera otozento metri, altro che trexento), inpenio de parole Lelo par quelo che'l ghea perso, i oto mussi da ranpego se rimete in marcia, fin al bivio par Campi Vecchio. Sola sinistra se vedea, incrucà in alto sol monte, ma no pì distante de quatro-zinquezento metri, on bel grumo de case co incolà in parte  na serie de archi che fasea da spala al muro de sostegno de on piazale e sora questo on palazon e on canpanile. La strada pa' 'ndarghe la fasea paura par la pendenza, ma le carte disea che par lì bisognava passare. E alora, via. El caso ga volesto che, quando che za el fià mancava, ghe fusse on incrocio dove che on tosato on fià incocalio el ghe spiega al cartografo che al paese se riva fasendo on giro pì longo, ma pì dolze. E alora, via, par la pì dolze. Lelo, bastian contrario dela mandria, ga ciapà inveze par el duro.

XE STA duro anca par delà rivare suso, ma la visita ghe volea. Tanta fadiga, ma tanto belo da vèdare. Sole carte lezemo che el posto—sia la vale in basso che el paese - el jera frequentà anca al'epoca de Roma. La cesa come el contorno, anca el piazale dela fotografia dessora, ga almanco mile ani. Na cesa strana, paraltro, che la pare depì on palazo da siuri, anca se ormai sbandonà. On davanti guarnio da na serie de colonete fine, che ghe dona al tuto na eleganza rufiana, on balcon che varda el mondo in basso sola vale. On posto justo par fare calche fotografia de primo piano, par i usi consentii dala leje. On indijeno orbo come na topinara, a domanda ga risposto dando spiegazion so come fare a catare el sentiero che disea le carte.

EL JERA in basso, cidenti! A verlo savesto se se podea sparagnare la salita... ma xe sta mejo cussì, a gavarissino perso Canpi Vecchio. In do e do quatro el sentiero xe catà, anca se'l jera sconto ben. On bel sterato che 'ndasea suso in dolze; el ghe volea dopo tanto sfalto. So on paeseto senza nome che se ciama Capo del Colle parea che'l sterato finisse, ma na veciota che la sta oncora so on container del teremoto, co on soriso da nona materna, la dà le drite juste par catarlo, on fià pì in su. Passà quelo che dovea essare l'ultimo cao de case, Piè la Rocca, el sentiero ga scumizià a 'ndare alto e a diventare pì bruto, tanto che la procession ga tacà a destregolarse; ma par l'ultimo trato ghe xe bisogno de na spiegazion aposta. El s'a presentà pì pendente del resto, co pochi sassi e co qualche petola de piegora qua e là. Jera onbra fita e sùito no s'a capio come mai che el fondo deventava moro. Xe sta el naso che ga fato ciaro: el sentiero jera sfaltà ...de merda de piegora, messa zo senza sparagnare, che la parea parfin fratonà. Tachente come la cola garavela - senza ofesa par Luigino - mora come la ciocolata Novi e dal'inconfondibile profumo de merda de piegora pena fata. E za che i oto eroi pantezava, le inalazion le 'ndasea drite al bersalio, come el vics vaporub. Par no parlare dela sacra bicicreta, che la se intaconava senpre depì so i freni e sole pidivele, deventà in zinque minuti on loamaro semovente.  Guai a sbrissare (ma jera inpossibile), parché anca le scarpe che se pozava zo le tornava su inpestà de maco, come quelo de blob. Fortuna che dopo on chilomtero el pastore ghea da ver deciso de voltare pai canpi cussì - ma ormai la garavana jera rivà ala Forca de Ancarano (el passo) - la trajedia jera finia. Ma no le conseguenze. El sentiero sbucava so la provinciale che da lì, co i ultimi sete chilometri de dissesa veloce, gavarìa portà el grupo a Norcia. Veloce la dissesa e anca el bonbardamento del petolame che se destacava dai copertuni e finìa ora sui uciai, ora sol cascheto e po' sol muso. Al'arivo xe sta obrigatorio 'ndare al lavajo co la lancia termica. El xe sta proprio on sentiero de merda. On giro torno la mura de Norcia par controlare la longheza gà messo in pace le cossienze, che le ghea tacà a spuzare anca quele. 2.125 metri, la mura.