CALCOSSA come otozento ani, portà dadio. Za el piazale davanti al'ingresso te mete in sojezion. Na costruzion grande, no maestosa, però piena de tirante. Tirà a spago, ma rustega, tuta in piera greza, co na ceseta senplice e on canpanile ranpegà sola rocia, come che'l ghe fusse nato dessora. La solita vocazion sberegona del grupo no se ga fato sentire dopo passà el portego de ingresso, che'l dà so on cortileto interno pien de angoliti e de viste rufiane. Fiori e piante spampanà qua e la, come se fusse a caso, i fa el resto par fare de sta abazia on posto speciale. Ne saria piasesto vedare e parlarghe a qualche frate, anca par scoprire de che marca ch'i xe, ma i jera in ritiro. La ghe volea sta deviazion, ga ciciolà Luigino soto ose a Tomaso, gavarissino perso on'ocasion. E po' el s'a ricordà ca ghivino visto za altre cese intestà al Santo. A Ocricchio e 'l Duomo de Ascoli Piceno: segno ch'el xe on Santo inportante da ste parte.  La devozion de Renzo, che inte sti casi el finisse senpre par comuovare tuti, la ga partorio on ato comovente: par ringraziare che Giuliano no s'a copà so l'incidente spaventoso de mez'ora prima, pena rivà drento in cesa el xe 'nda a métare on candeloto al Santo Eutizio, eleto santo protetore d'i ciclisti che tanpona quili davanti e no se fa squasi gnente. Giuliano gà sofegà on'orazion.