DOPO el pasto i casi xe du, de solito: la zente se ingalozisse, e alora tuti fa d'i numari da no credare. Opure la se rincojonisse e alora calchedun fa d'i numari da no credare. El panin al posto de fruta e verdura ghea fato presa intel stomego e no ghea bastà tuta l'aqua dela boracia par digerirlo. Zo dala dissesa, drio la statale par Norcia ghe xe Borgo Preci - la parte bassa del paese -e lì la mandria s'a fermà parché i pì debole ghea da bevare el cafetin. Fato. Po' tuti via, ala cacia dela prossima deviazion. Xe sucesso tuto durante sto trasferimento, strada sfalto in salita dolze, velocità da digestion. Uno de drio ga zigà de fermarse, el Mestro davanti se bloca, Giuliano - secondo - el se volta e, come on oco, el tanpona el Mestro. Moviola: e l M e s t r o s e f e r m a, G i u l i a n o s e v o l t a e n o v e d e d a v a n t i, c u s s ì e l t a n p o n a; e l c a s c a i n a v a n t i t r a v e r s o e l m a n u b r i o s b a t e n d o n a l a c a e f a n d o c a o l i e v a; e l M e s t r o l o b r i n c a p a l z a i n o s e n ò e l p i a n t a e l m u s o p a r t e r a . Xe sta naturale, rivà al primo incrocio, ranpegarse par otozento metri fin a S. Eutizio.

A DIRE la verità la xe sta na decision de Renzo. Varda, Mestro, su par lì ghe xe na abazia, a trexento metri. 'Ndemo a ringraziare el santo par el pericolo scanpà. Giuliano, noto miscredente, el se lagnava oncora pa'l male, ma el jera d'acordo. E anca tuti staltri. El segnale, po', el parea dire che se tratava de na roba inportante. Tolta la decision, tuti se introza su par la salita. Cidenti! la tirava come el Monterico, e anca on bel venteselo, tirava. Però, de oto solo sete s'a convertio; infati, Lelo, noto miscredente, el s'a rifiutà de venere su par via, s'a scusà elo, che'l canbio ghe s-ciocava. Ogni dì na biastema nuova.

I soldadi ghea fame, ma a nissuni ghe xe passà par la mente de sarare i oci: Preci porta oncora, che fa sgrisole, i segni del teremoto del '97. Inpalcadure on fià dapartuto, anca torno ala cesa; case oncora inbragà e pontelà; tanti restauri za fati, de case e anca dele stradale che le xe tute a scalini de marmo. Soto a on portego de on palazoto medievale i baicari s'a ingrumà - fin che piovea - par magnare calcossa: el panin conprà co tanto amore dal vivandiere del grupo e la ueta del Mestro. Ghe jera on silenzio strànio e nissuni par le stradete, gnanca on bocia. Renzo jera in vena de fotografie artistiche e anca Luigino, ma de elo no se ne ga incorto nissuni. Sarà sta on caso, ma fin ca jerino drio magnare al comercialista del grupo ghe xe vegnù oja de confessarse. Ghio fato caso che oncuò no go mai tacà el turbo? Eh, e come mai? ghe domanda Lelo che'l ghea fato caso. Parché jeri a go svodà la betoniera! So conpare, tegnù anca elo al'oscuro, el ga fato on sospiro de solievo: el ga vivesto tri dì soto minacia de rotura dela càmara de conpression. Dopo on brindisi diretamente dale borace, xe ora de metarse in movimento.