FINIA la mignognola fra i postini, soto l'ocio atento de Luigino e de la so machineta fotografica dela mutua radi e getta - v. foto dessora - ala spiciolata i baicari ga scumizià l'esodo da Legogne. El centro storico, poco pì de quelo che se vede sola fotografia, xe sta traversà in quaranta secondi e inte nantri diese el grupo jera za fora dala periferia, sola strada verso Forsivo. I du paesiti se vede uno co l'atro, salvo che no ghe sia fumara, e i xe zontà da na bela strada sfalto rustego che la core drio el monte in piano. Jera frescheto, par via del vento che se intrufolava so la gola e, dopo vere sbatù i corni sol monte, el tornava indrio par la stessa strada del drapelo. In giro no ghe jera altro. L'unico incontro xe sta oncora la Panda dela postina, che ala vista de Claudio la ga stronbazà senza retegno. Ghe ga risposto, pien de grazia, Lelo co na proposta sfaciata de matrimonio: se te si libara te sposo anca sùito; el tenpo de organizare arquante coriere de invità, po' la cerimonia e po' me trasferisso qua. Sito Contenta? La Panda xe sparìa drio na curva. Scanpà el pericolo par

Claudio, za convinto de doverse fare le man da caviji co Lelo, el squadron ga continuà fin a Forsivo, on paesetto - pecà par elo - pien de gnente e co du turisti romani insemenii che ga volesto farghe paura ai duri co storie sola pendenza da sbochi del seguito dela strada. A dire la verità jera scrito anca sola carta, ma a ogni modo, se ga fato vanti - dopo la sosta par spandare aqua - tri chilomtri de monterico. Fin a na curva dove che ghe jera la deviazion col sterato promessa dala guida. E co tanto de vache e tori a fare la guardia al'incrocio. Tuto intorno el mondo parea finto. Da on cao pascoli a scavalco de monte, co le bestie indafarà a fare passare la jornata. Da tuti staltri gobe de monte che, una dopo  l'altra, tegnea disegnà la difarenza fra cielo e tera, co calche frasca messa lì par ronpare la lontananza. El serpenton dela strada che continuava verso la prima curva par conparire ala vista pì vanti, prima de nantra curva. Tuto fato so on silenzio in barufa col tenpo, par vedare chi che finisse prima.

On supion dopo i oto jera za in dissesa so on sterato favoloso, na

mulatiera tegnù come la montagnola del prete, che la se buta in pendenza

gajarda verso nantra vale, dove che za in lontananza se vedea dele

case e la spiera de arquanti paesiti spanpanà sui

cocuzoli. Come vegnù

fora dal saco, s'a presentà al'inproviso Poggio di Croce. On castelo,

na tore e na cesa.

 ●  On taramoto ogni vint’ani

 ●  On Santo par l’ocasion

 ●  Sentieri de merda

 ●  Scontri ravicinati