Jera on piazere vedare come che se strucava i du colunbi viajadori.

Pecà dovere 'ndar  via...

JERA tanta la speranza che no piovesse, parché so la storia dela stimana santa in MTB no s'a mai visto che no sia sta fati almanco tri giri. E po' se ghea deciso de fare on gireto d'i borghiti medievali, che ghe n'è on spagnaro in zona. Ala matina ghe jera fumara! Bon segno. Par no catarse sorprese el grupo ga fato in pressa a partire, dopo el solito rifornimento de fruta e verdura. Jera anuncià na bela salita de sfalto pa' 'ndare in quota, e difati bela. E in pratica

senza trafico,dopo ghemo capio parché. Purtropo, man man che se 'ndasea su, la fumara restava zo a scondare el panorama so Norcia. La prima meta jera el paeseto de Legogne. Ga volesto el so tenpo, ma semo rivà. On borgheto de sete case, co in fondo ala via principale - l'unica - na ceseta desfata, dal teremoto. Fin ca jerino in visita, l'unica machina vista fin lì s'a messo a stronbazare ronpendo l'incanto del luogo. Perdonà. La jera na postina in trasferta, co

arquante letere da consegnare ai du tri vecioti del posto. Postina? Cara collega! Claudio se ga ingaluzio sùito, depì de come che'l fa senpre quando che'l cata on colega. Sorisi, compriminti, parolete de conprension, e via discorendo. In tri minuti el jera inamorà come on pito. E tanto el ga fato che el Mestro, inpietosio dala situazion, el ga convinto la tosa a farse fotografare col postin del centro Padova. No la ga fato on sforzo, però, parché anca ela jera in borezzo. I s'a strucà come du morositi, par on atimo solo, ma intenso. Elo el ga anca ciciolà calcossa, ma sola fotografia no se vede cossa.  Ma vegnemo ala ceseta desfata. On volontario indijeno el jera drio sarare i busi par l'inverno. Drento jera tuto crolà, fora che el controsofito, tuto de legno intarsià e indorà, nuovo. Pena finio de restaurare dopo el teremoto del '79 quando che xe rivà quelo del '97. Questo, po', oltre ai dani, ga fato anca on miracolo. Xe crolà na parete che scondea nantra parete pì vecia, co na colonina spetacolare, che la scondea nantra nichia, pi vecia oncora, tuto afrescà.  Vrdando ben fotografia chi in parte se pole capire come che sta le robe. La xe proprio na maraveja, e on pecà no assare cussì la parete. Intanto, però, chissà che riva i schei pa'l  restauro. P.S.: la postina confessa de no essare maridà.

VARDARE BEN: ghe xe tri strati, uno scondea staltro!

 

· la parte a destra afrescà inquerciava la coloneta

· La coloneta e la parte a sinistra jera soto, sconte

· L’afresco co le figure, sol fondo, jera inquercià dala parete co la coloneta