Eà pióva de jéri sera no faseva gnente ben sperare, come pure 'e prevision del ténpo. E difati oncò pióve a diroto, co eà conseguénsa che eà garavana al conpleto eà se spostarà a Ascoli Piceno, na sinquantina de chiòmetri deà del monte. Tre machine par undese (ghe xe anca 'e spose) bastarà. Gnente storia drio eà strada, a parte che ga voésto do ore par rivare: curve, saìta, trafico, strade strete. Xe sta on pocheto fadiga catare da parchegiare, ma ga vaésto eà pena rivare fin là. Eà sità xe negà fra e coìne e streta fra do torénti, inbrutia da viadoti e trati de autostrada. Drénto, però, eà xe on gioieéto. Mai vista na racolta cussì grande de paeassoni medievai e de cése, una ogni diése case. Tuti col naso pararia, no sòeo par controeàre la pióva che eà vegnea e no eà vegnea, ma par vedare tute che'e faciate de piéra massicia, quasi tute in travertino. Na piasseta, in particoeàre, ne ga piasùo a tuti: Piazza del Popolo. Do fie de portegheti co coeonete fine fine e, da na parte, on paeàsso che se alsava sora de tuto. Visità e piasuo subito; el gavea, co poxà sora na

serie de portegheti, on bel cortieto interno co na scainà torno che portava ai piani, e i anbiénti doparà par mostre varie. Inteigénti. Sercando una dee tante cése e anca on posto par magnare calcossa, Leonardo ga tolto in préstio na onbrea posà fóra da on negossio, ma nissun se ga eamentà. Par ripararse semo finìi al marca dea fruta. Na specie de chiostro co i portegheti ocupà da contadini che vendea eà so marcansia. On paro de veceti faceva fin teneressa. Ghe jéra restà na casseeta de fighi e on póchi de pómi. Inprovisamente ne xe vegnùa voja de fighi e cussi i gavemo conprà tuti. I oceti dei veceti slusegava pa' eà comossion. Che eà xe costà sóeo tre euro. El pasto eò gavemo consumà so eà riva del torénte: on panin co eà mortadea, vegnù più bón parché gavea smesso de pióvare. Finia eà visita dea sità e montà in machina, col soe che ormai faceva oceto dae nuvoe, 'e tre machine se ga introsà verso casa, fasendo na deviassion su par Forca Canapine par riussire a fare on salto a Castelluccio. Rivisto anca queo, sénpre de gusto. Se stasévimo a Norcia podévimo fare on giro, el pomerigio. Forse doman.

Inpression de viajo, cavàe fóra da Giacomo co eà fotografia de Rénso