I LO DISE senpre par television, quando ch'i fa l'areclan de l'aqua. Par èssare bei e in forma bisogna fare tanta pipì. I nostri eroi, senpre al'erta quando che se trata de salute e de forma, i s'a messo a fare tanta pipì in tanti parfin sola  spianata de Castelluccio. E fu bene. Ma, dixe oncora el dotore, no basta fare tanta pipì. E alora?. Alora qua se verze nantro discorso, on fià pì ingrejà, parché on conto xe fare tanta pipì e on conto xe fare tanta popò. Siorsì, popò! Prova ti a tegnerte drento par tri dì tuto quelo che te ghe magnà da quatro dì. Te s-cioparissi, te dovarissi tasere par paura che vegna fora tuto par sora, te farissi aria dal bon profumo de quora, te dovarissi umiliarte a tore sculiarà de Cagarol in grani prima e dopo i

pasti; par no parlare dela ziera che la deventaria senpre pì zalo-verde. I dotore sospeta anca che chi che xe intronbonà - termine tenico - ghe se inturbia parfin i pensieri e quando ch'i parla i finisse par fare senpre na figura de merda. Cossa se fa, alora? Vita sana e tanto sport. E se no basta, dotore? Alora bisogna ricorare al Chi-Kung (se pronuncia cicùn), on sistema orientale. Che sarìa? Dunque, Luigino, te te incuci, te te miti el deo grosso dela destra su pa'l buso intaressà e co la man sinistra te te bati sola panza. Al primo movimento te cavi el deo e, plop, tuto risolto. Consilià prima d'i pasti, mai durante...