In fondo, la basilica de S. Rita

On paese

remesso a nuovo                   senza sparagnare. Afari de oro

par quili che

sfruta el turismo  che gira

torno ai santi.

DRIO i diese chilometri de sfalto, tuto in dissesa co curve larghe e fate de fuga, la giunta par le urgenze ga vu tenpo de pensare ala via del ritorno. Sarìa sta belo fare el sterato che da Ospedaletto va zo de rugolon fin a Norcia, ma cussì bisognava rifare in salita tuta sta dissesa, che la jera in bona pendenza. Diese chilometri xe tanti, ga dito squasi a na ose Luigino e Giacomo. Se vedarà na volta rivà a Cascia. L'è sta on supion. Dopo on paro de incroci, el paese se intravedea in alto so on colle. El prometea ben. Avicinandose ghe jera mile indicazion de alberghi e parcheji par coriere. El primo piazale che s'a presentà no'l ghea gnente de vecio. Costruzion moderne, marmi nuovi anca par tera, na fontana-monumento in stile domila. E da lì scale mobili e ascensori pa' 'ndare suso. Fin che siè bevea on tè e Lelo 'ndasea a studiare i cantuni dela piaza, Claudio xe sta ciapà da na crisi de cossienza e 'l ga dovesto zercare de corsa on vater: sindrome da fine de intasamento setimanale. Ala facia de Luigino che'l se portava oncora tuto drio. Assà el fardelo de Claudio e pagà el conto, la mandria ciapa i feri e la se ranpega verso el centro.

LA VISITA - lanpo - dela basilica de S. Rita xe sta na delusion. Evidente a ogni passo che là tuto xe in funzion dela Santa. Ca credemo che no la sia  d'acordo de tuto el marcà. Scorierà de vecioti sbalotà pa’i alberghi, boteghete che vende solo la Santa, on paese intiero ala so onbra. E la basilica fa scareze: bruta fora e drento, on obbrobrio che gavaria fato inoridire l'architeto Daniele. Via da lì! Se decide de tornare a Norcia par la strada statale. On viajo senza storia, co na variante sola. A tiro de on posto che se ciama Serravalle ghe xe na galeria da passare. Senza luce ela, senza fanali le bici. Ma Lelo ga na sorpresa: da na scarsela el tira fora on fanalin rosso, el  lo invida drio la sela e, metendose in retroguardia, el fa ciaro al culo dela procession. E pensare - visto dopo - che in parte ala galeria ghe jera la vecia strada! Da lì a Norcia siè chilometri de trafico, na salitela da vecioti fata co na nuvoleta in testa che ga pissà arquante jozze.