DOPO verghe catà l'angolo in mezo a tute le stradele sol monte, butandose in dissesa so on sterato largo ma malefico, la menoaja riva so na corte, passando davanti a d'i container servii de sicuro pal teremoto. Quello del '79, informa na veciota intenta a darghe da magnare ale

oche. Lu paese? Trenta metri oltre el ponaro ghe xe la piaza. Ghe xe na ceseta co tacà la canonica co tacà la proloco co taca al muro el monumento ai caduti. Fora ghe xe i resti de na festa: do tole e calche panchina. Quelo che ghe vole par fermarse a marenda. I pelegrini

ga fame e a ricordarghelo ghe juta la canpanela sol canpanile che la sona on boto. El sole scota, a dispeto dela nuvoleta de Fantozi che ghea fato conpagnia al proton fin che'l zercava la via justa sol monte. Le marissandole se mete sùito al sole e calchedun se cava le arte e le mete a sugare. Lelo ghe manca poco che'l faga on striptis e, anca se staltri protesta parché la xe na vargogna, el se mete in mezo ala piaza che'l pare na mezena de luja messa a secare. El Mestro cata el tenpo par studiare le carte e propore de slongare el giro. Signora, ghe xe Cascia da ste parte? Diese chilometri de dissesa sfaltà. Afare fato. La pro loco no vedea l'ora che Lelo se vestisse: ormai el jera suto.