TUTI pare intenzionà a fare ben. Pena fora dala porta Ascolana, el serpente de montanbai ciapa la strada dela spianata de Santa Scolastica - che la jera la sorela jemela de San Benedeto (la Santa, no la spianata) - e el se cata sùito a pentare in salita. Na pendenza da veciote, però. Al bivio che manda su par Castelluccio - Km. 28 - ocore cavarse el majon, parché 'ntel fratenpo jera vegnù fora el sole. On grazie de cuore al'abitudine de Norcia. La muta va su ciacolando, parché la strada no la xe tanto in pendenza. Luigino taca a sbufare che anca se no la pende la xe longa e "gheto presente el Grapa?". Quili che lo ga fato ga presente, ma i spera ben. Dopo na diesena de chilometri, passà da tenpo el bivio che manda i camio a Ascoli par nantra parte, co mile ringraziaminti al'ANAS, el portacarte - Lelo - che'l jera davanti come che'l ghesse da sminare la strada, el parte de fuga. Co la coa del'ocio el ghea visto Renzo che scatava, co l'intenzion de vinzare na volata inprovisà, de quele che da calche mese el se inventa elo senza preaviso. El grupo no ga fato altro che vedare Renzo che canbiava raporto, du metri de drio de Lelo e po' tuti du i xe sparìi dala vista. L'arivo xe in salita, e anca dopo na curva. On zigo de vitoria ga rinbonbà par tuta la montagna fin zo a Norcia. Contro ogni prevision, Renzo ghea vinto. Ma la verità no xe vegnù fora sùito, parché a Lelo no la gha va zo...

NO SERVE dire che tuto xe proteto dala privacì. A ogni modo, Renzo dopo el misfato ga fato finta de èssare desfato e 'l se ga messo sole retrovie, spetando che el vinto ghe ciapesse el corajo de 'ndarghe a rendare i onori. Ga volesto on mediatore navegà parché la question se  saresse. Lelo, anca se contro oja, el s'a umilià e, co on lagremoto che ghe bagnava le massele, l'è nda a darghe la man al prode. In canbio del silenzio eterno sola question, riportà qua solo par la cronaca. Da desso muci!

LA PARTENZA jera spetà da tuti col cuore in gola. Podea anca piòvare! No ghe jera Oscar a fare le prevision del tenpo, ma anca Luigino no scherza in proposito. Verto el balcon, Norcia jera sofegà dala fumara. In pieno Agosto? I primi a 'ndar zo in strada ga volesto fare suito domande ai locali. " Qui è normale, dopo esce fori lu sole", ghe dixe uno a Giuliano, bituà a vardere el cielo la matina par via de l'onbrelon da vèrzare. Ale oto in broca el grupeto, come par incanto, risega insieme el muro dela dependance e se intrufola in sala da pranzo par la marenda. L'abufè ofre de tuto, dale marmelatine al buro, dal pan col late al yogurt e po' salame, ricota, fete biscotate, sughiti de fruta e cafè e late e... Bisogna magnare tuto par fare provista de forza. I oto sa de vere on inpegno grande, parché el cartografo ga nominà la piana de Castelluccio. Se va par sterato? No, consilia l'indijeno, parché la piova lo ga sassinà. E alora su par la sfalto. El caligo inumidisse i caviji, ma la garavana speta el sole e la parte piena de speranza. No pole piòvare, come che dixe de solito Tomaso.

Sol

fondo,

Norcia

Riunion in corso

La congregazion la xe cressù, sto ano. Nantri du novizi ga ciapà i voti e i pole cantare messa insieme co staltri. Ma, che sia la novità o che sia che no i ga gnancora inparà la regola, fatostà...