Finalmente (ma jera tanto belo…), el sentiero finisse e el riva, come da prevision, sol ponte de l’Anguilla, da dove che, girando a sinistra so la provinciale che la jera lì che la spetava, el grupeto taca la salita par tornare a Bosco. Ma xe massa presto, cussì almanco pensa Renzo. E staltri xe d’acordo. Fati on paro de chilometri, a tiro de ’na casa co davanti ’na stradela che ’ndasea in zo, on indigeno de poche parole, a la domanda del Mestro el ga risposto: “Sì, zo par lì se va a Bosco, po’ girè e po’ ’ndè su e po’ zo e po’…”. Grazie, signor. E lì ga tacà tuta na serie de capele che el Mestro, in mancanza de ’na carta da lèzare, ga inpirà una drio staltra. La prima xe sta scoltare el vecioto inbanbio. A ogni modo se va zo. Dopo tresento metri de bela dissesa, la sielta xe par ’na mulatiera che va su a sinistra: Dura come el fero, curta e tradidora, parché la finia da nuovo so la sfalto. E questa xe la seconda capela. Fin che Ciano, ciapà da i so pensieri el vegnéa oncora su a piè, riva l’órdene: se torna indrio. Zo, a l’incrocio de prima. Incrocio… Ghe jera da ciapare o la stradela e tornare indrio o ’na carezà che menava a ’na casa. Bona la carezà. Prima de la casa el sentiero paréa ciamare a destra. Tuti d’acordo, se va su. Belo, in salita, co tanto de passajo davanti a ’na vecia casa, po’ el colpo de sena: se finisse so ’na ponta ...a forma de prà, circondà da muri a seco alti tre spane, co a destra, in basso, on vajo. Terza capela. La consultazion de la giunta no la porta a gnente, ma Renzo - col gran de pévaro sol culo - el parte in pichiata, el scavalca on mureto e po’ el se buta in mezo a le russe. Staltri nò. Dopo diese menuti, la sconparsa de Renzo fa ben sperare: el ciama, “vegnì zo…”. E zo. Se ritorna so la carezà, ciapando la direzion de la casa de prima. Lì ghe xe Renzo: “On sior me ga dito de ’ndare par là”, el dise pontando el deo verso on bosco. Spario el sior, ai zinque se presenta on incrocio come quelo de la Stanga, ma fato de sentieriti. A sinistra ghe jera quelo che disea el sior, secondo Renzo; a destra uno pì picoleto che paréa menare in malora e davanti ’nantro che ’ndaséa in su, co l’aria de girare torno al monte. “Se va par lì!”. Par de lì, alora...

   Ciò, bela la sielta, ma sùito maledia parché el sentiero se faséa dare del vu: sassi smossi, foje seche de fajo e salita da sbochi. Falisse tuti i tentativi de stare in sela. Ciano xe convinto che le strade del Punjab le sia mejo, ma no ghe xe prove, solo la so parola. E alora se va su. Sol bosco ghe saéa da cicramini, on profumo cussì potente che lo ga sentìo anca Giuliano che ’l ga la ’lergìa. ’Na destirà de fiuriti picinini, ma cussì inprofumà che paréa che fusse passà el bidelo co la bonboleta sprai par scóndare chissà quala spuzza. A on zerto punto, in sela za da dosento metri, el drapelo riva a on porton, co a sinsitra ’nantro sentiero che girava de bruto verso el monte. Nissuni ga pensà che se dovesse ’ndare par lì: el Mestro verze el porton e staltri ghe va drio volentiera. In do e do quatro el troduolo - prima stretolin - el se slarga passando davanti a ’na casa sbandonà e po’ el finisse so ’na corte. “Biancheri”, sentenzia Renzo, “semo a la contrà de Biancheri”. Darghe rason la xe sta ’na òpara bona, ma jera vero. Da lì ’na bela strada bianca ga portà in pressa verso ’nantra contràdela da dove che partìa on sentiereto in mezo al verde, on fià insassà, ma belo. Dopo l’arivo a Bosco, che ormai el jera a tiro, Tomaso porta la notizia che Ciano, restà on fià indrio co elo a parlare de economia cinese, par ringraziare de èssare finalmente rivà, el ghea basà la tera. Nessun morto, on ferito, smorgà on polso.

ma ’l se smorga el polso destro.