L’Omo de Podestaria no gavarìa podesto consiliarne mejo. El vajo - ’na spece de culo de fosso, al primo scuminzio - el tacava, come che xe scrito so la pàjina prima, come on strodoleto largo ’na diesena de zentimetri, poco pi del coperton de le roe. Curvete, sassi da saltare, sassi che - on par de volte - ne ga fato desmontare, ma tuto ’na fola. El ga durà cussì par tre-quatrozento metri e po’ el xe deventà on trodo pien de sassi despiantà, largo, in pendenza e poco da fidarse. Renzo, come al so solito, el ga ciapà sùito la guida, meténdose davanti co la scusa che elo el ghe vede mejo de tuti. Sto trato de dissesa, come el strodoleto de prima, no parea fato par Ciano che, par fare contenta la fémena e anca la bicicreta, el xe sta pi a piè che in sela. Pi vanti, co on salto inproviso, la mulatiera cascava so

so on sentiero pi largo, pi ben messo, manco in pendenza: ’na roba da no desmentegare. Gnanca el letore uficiale de le carte saéa ben dove che ’ndesse a finire sta corsa, ma el s’à fidà de l’Omo de Podestaria: “fè tuto el vajo - el ga dito - e rivè al ponte dove che se ciapa la strada Bosco - Erbezzo. Da lì fè quel che volì”. Manco male. Dopo almanco quatro chilometri boni de dissesa, co canbio continuo de vista, de bosco, de rocete varie, on incontro ravicinato! Renzo frena de colpo, el Mestro - a roa - anca e staltri i fà conpagno, sùito dopo. Che vegnéa in senso contrario jera qua on montabaicaro fémena, che la pantezava de bruto, ma la jera ’na bela tosa instesso. “Ciao - disemo comossi e par educazion” e ela anca. Tuta sola, “...co ’na amiga”, che no se veéea a l’orizonte. La domanda se par lì se va a S. Giorgio, come dire se par Stanghela se pole ’ndare in Francia. In poche parole el Mestro ghe spiega che no le sarìa robe par ela, anca parché in salita ghe tocarìa farla co la bici in spala. La saludemo co l’ocio birbo, prometéndoghe de catare la so amiga (anca se Giuliano, bituà a studiare le spose al marcà, el credea che la ne ghesse contà ’na bala par paura de noantri, pori inocenti…). Semo ’nda zo almanco ’nantro chilometro prima de catare staltra, ferma a on bivio che no la saéa pi cossa pensare. “Dovevamo andare suso per di quato -  el confessa - ma la mia amiga xe ’ndata vanti co la scusa che a me mi ci si vi scanpàvano un bisognino”. El Mestro e Giuliano, comossi, i se ofre de tornare indrio par avisare staltra del sbalio tremendo. I la ga catà dopo tresento metri, che la vegnea in zo, ’vendo capio che la costion se ghea ingarbujà. Le s’à rognà vinti secundi e po’ le ga ciapà  el bivio che menava a la malga Lessinia. Ciao bele!