No serve dire, ma comunque la trupa a la fine se ga riunio, a fare marenda so ’na spece de pojolo de ’na spece de chiosco che - ’sendo sarà - l’esperienza ne dise che ’l xe verto solo de inverno. Toca métarse a la remocia, parché so la bancheta co vista sol panorama tira ’na bava che no fà ben al colo ...suà. Ne fà conpagnia ’na streja de conejìti, che ogni tanto i core da on cao a l’altro del prà, par scondarse sùito in mezo a le erbe alte, o soto el tolà. Ghe xe da ricordare che, par creanza, Ciano el ghea domandà de stare lì a on tizio, sbucà da portesina de ’na spece de caseta e sparìo come par on incanto sùito dopo. “Potette stare, siorsì…”, el ga dito a la domanda. Poco pi in suso del chiosco ghe xe el rifujo del Monte Tomba, grande e grosso, ma tegnù pezo de

…’na stala e co l’esterno incasinà cofà la corte de zerte vece boarìe, co polame vario e calche càvara che circolava senza controlo. Ciano, bituà ai alberghi a sete stele de Siangài o de On-Con, el ga fato fadiga a distìnguare el paron - on montanaro co na scavejara zala che fasea tuto uno co la barba da cavaron - dal can pastore bergamasco, zalo-onto anca elo. Ghe volea ’na fotografia, ma la  gavarìa fato torto a ste quatro bele pajinete, cussì piene de sentimento...

re ’na cartina tacà al muro, drento al locale. Quelo de la barba el se ofre volontario: “Ghe xe calche trozo pa’ ’ndare a Bosco?”, domanda el Mestro. “Sì - el dise staltro - el xe che ’l vajo là in fondo. Ghe ’ndè drio fin… No saì cossa che xe on vajo? - el dise co ’na facia da domanda senza risposta al Mestro”. “No, sior…”. “El sarìa ’na spece de fondo vale, streto…”, “on culo del fosso, alora… Go capìo - finisse par dire Renato”. Staltro lo varda male, ma po’, bituà a darghe senpre rason al cliente, el ghe dà el resto de le indicazion. Zo par l’erba par dosento metri fin a on segnaleto, de cao de la pozza de l’aqua par le vache. Po’, da lì, tacava on strodoleto largo cofà la roa de la bicicreta, pien de sassi, ma spetacolare. El prometéa ben, anca se Ciano no jera d’acordo, che robe cussì in India e in Cina no ghe n’è...