La mulatiera, dopo el primo trato, la va su mòrbia e la finisse, viajando squasi in costa del Monte Tomba che xe senpre so la destra del drapelo, la sboca a la fine so la strada pi larga, senpre rota, che fà tuto el giro de le alture. Jera passà on boto e la fame la se faséa za sentire, anca se prima de S. Giorgio el Mestro ghea dà órdene de magnare calcossa: ’na banana, ’na sbrancadela de ueta, arquante nosele brasiliane - ’na spece de bonba ’tomica - e el misto seco de Giuliano. Justo par no ’ndare in crisi de fame. Renzo se ghea amutinà e no ’l ga volesto scoltare nissuni: “mi - el ga dito - go tolto la pastilieta stamatina… Jera passà on boto, donca, ma restava da fare solo la conquista del Monte Tomba, che, a tiro de s-ciopo, el jera poco pi distante de zinquezento metri. E qua te vojo…