Titolo pagina

Casella di testo: S. Giorgio merita on discorso fato aposta. El posto ciapa el nome da ’na vecia malga, che se vede sol cocuzzolo a sinistra, dessora le case. El xe deventà, col passare d’i ani, on posto de vilejatura, spece de inverno, e in quatro e quatro oto, torno ai ani setanta, xe nate de le case che a métare in galera chi che ga fato el projeto e chi che lo ga aprovà se farìa ’na òpara bona, magari meténdoghe in conpagnia anca l’inpresario che le ga fate. Mai visto gnente de pì schifoso. Adesso xe tuto deventà vecio e sbecotà, anca parché le xe sta fate sparagnando so tuto, e cussì tuto l’anbaradan pare oncora pi bruto. No ghe xe case ùgnole, ma tuti condomini fati senza riguardo a la montagna che ghe xe torno, a le tradizion, al paesajo, a gnente, insoma. So la fotografia, par fortuna, xe vegnù fora in primo piano dele face da galantomani che, anca se bele no le xe, almanco le xe naturali, cioè projetà dal Padreterno, che no se pole dirghe che ’l gabia fato on laóro fato male. Chi che s’à messo in posa jera vestio ben parché, so chel momento, tirava ’na bavesela da tajo - semo sora i 1.500 metri - e dopo de lì tocava dissesa. No diremo altro so S. Giorgio...

Dopo che el portinaro de turno - Tomaso - ga sarà l’ultimo spago che fa da sbara, a la fine de la dissesa, el grupo se cata sol piazzale-parchéjo che ghe xe a l’inboco del paese - se cussì volemo ciamare sta porcarìa - de S. Giorgio. Solo el tenpo de decìdare se cavarse le jachete o tegnerle (ghe xe salita, adesso, ma tira anca e oncora la bavesela fresca…). La direzion da ciapare la xe quela del Monte Tomba, che se pole rivarghe fasendo on poco de sfalto, ciapando a sinistra, e po’ ’na mulatiera, opure - ciapando a destra - on sentiero de tri-quatro chilometri in salita. Decidemo de tegnerse questo par farlo in dissesa ’nantra volta, cussì ’ndemo suso par la sfalto, a sinistra. Gnente da dire, se no che ’ndando su se cata d’i altri condomini - VENDESI squasi dapartuto… - uno pi bruto de staltro. Manco de du chilometri e taca la mulatiera. No la xe messa male, ma la va su gajarda e cussì , come che xe scrito sol regolamento de la conbricola, Giuliano e el Mestro ghe toca ’ndare vanti, Ciano in mezo a fare da colegamento e Renzo e Tomaso so le retrovie, a tegnere in òrdene la coa. Ogni tanto i du batistrada se ferma, senpre da regolamento, par controlare la situazion e po’ ghe toca ’ndare vanti, senza spetare. El sentiero xe tuto ’na curva, cussì xe fadiga ’ndare vanti vedéndosse tuti. Co sti problemi, riva presto el gropo...