Renzo el jera tuto agità, come se ’l ghesse visto i fantasmi e no ’l capìa parché el Mestro fusse cussì contento. E no bisognava dìrghelo, gnanca, parché elo el jera oncora intronbonà. Ghe semo ’ndà drio de corsa, par educazion, par no dirghe mato, ma el lo ghea el motivo de èssare spirità. Ecóme! El ghea catà la crosara, quela ca ghìvino da ciapare a destra. Ma zo par de lì no ghe jera solo la contrà par dove ca ghìvino da passare noantri: ghe ne jera disdòto in tuto! Vardè che sorte de cartelo! No ghe xe gnente da spiegare, el parla da elo solo. A demo solo arquanti nùmari. Alora: disdòto cartei, quatro paliti par tegnerli su, do stafe par cartelo che fa trentasiè, quatro vide par stafa, uguale a zentoqarantaquatro, oltre a altretante rondele. Chi che riva lì in machina par savére se xe par lì che ’l ga da ’ndare ghe toca canpejare, no ghe basta fermarse. E se ghe fusse el trafico de la tangenziale de Mestre el farìa ’na coa de otanta chilometri. A semo proprio curiusi de védare tuti ’sti posti, parché quelo ca ghìvino da traversare noantri el xe Squaranto, che drio la strada el xe l’ultimo. Renzo xe contento de ’vere fato ’sta scoperta, come se ’l ghesse catà la bala d’oro, e no ’l vorìa pi assare el posto. Ma xe ora de rimétarse in sela. La xe dissesa, sùito bela, sfaltà rùstega, streta che passarìa solo ’na machina. Se vede che fin lì a jerino ’ndà parecio in zo, rivando a tiro de squasi otozento metri, parché no ghe jera pi bosco, ma

pomari e nogare. I pumi, a dire la verità, i jera grossi po-co pi de ’na xìsola, verde e duri come balini da s-ciòpo. Dopo on chilometro a ghemo capìo come che la funzionava la storia de tute le contrà d’i cartei. A ’na crosara, du cartei mandava a destra par Zuliani di Qua e Zerlotti. Poco pi vanti, ’nantra crosareta, a sinistra stavolta, dove che i cartei mandava a Spina e Loneri. A ogni crosara sparìa ’na contrà o pi de una. Xe sta cussì ca le ghemo perse tute, prima de rivare a Squaranto. So la penultima contradela, siè case, on ponareto e ’na stala co do vache derucà, Guaina, ghemo dovesto fermarse parché ghea tacà a sgiozzolare. Jozzoti grossi che no prometéa gnente de bon. Ma ghe n’emo contà disnòve, in tuto, e po’ ga sbalà. Squaranto jera senza cartelo. “Semo a Squaranto, qua? E dove xelo el sentiero par Bosco?”. On tosato s’à oferto de domandarghe a so sorela. “Ghe xe el sentiero - el porta la notizia - ma no se va su in bicicreta e po’ el xe streto e pien de antrighe alte on metro, parte par parte.”