El Mestro ghea tratà da salvàdego el pertegon piè veloce, passà in mezo a tuti, fermi, senza saludare. Ma el ghea saludà, invezze, solo che elo no lo ghea sentìo. Scusa. Rimontà in sela ghemo spassà el caminadore e in du menuti semo passà par la Contrà Brutti (do casete sbandonà) che i dovarìa ciamarla Nissuni’ e po’ semo riva a Merli. Questa sì che la jera ’na bela contrà! Na diesena de casete, stravece, ma messe ben, in circolo. La sorpresa xe sta che lì la strada la finìa. La jera bela larga, fin lì, ma la finìa in corte, so la corte messa in mezo a tute le casete de la contrà. “E ’desso?”, se preocupa Ciano, bituà co l’ajenzìa de viajo che ghe fa catare senpre tuto pronto. Intanto jera qua da nuovo el pertegon co l’acento veronese, ca lo ghemo fermà justo in tenpo, parché el jera za drio sparire zo par on trodoleto largo trenta schei, fra do murete de do casete vizzine. “Lu, xelo pratico, qua, del luogo?”, lo interoga Tomaso, che de solito no ’l se intaressa de ste robe. “Se pole, par de qua, ’rivare fin ai Pàrpari” ghe domanda el Mestro, ciamando par nome e cognome le robe. “Si - el dise - ma xe tanto tenpo ca no vago. Comunque la xe bruta, in bicicreta, forse da fare tuta a piè… E senò, - el continua senza èssare interogà - podì vegnere zo par de qua, po’ al bivio ca cataremo pi vanti, ciapare a destra: se riva a San Francesco. A rivedèrcelo”. E po’ el parte, du metri a ogni passo. Par paura de pèrdarse, decidemo de ’ndarghe drio so chel trodoleto largo trenta schei, pien de sassi e de antrighe parte par parte. De becuni ghemo fato la racolta tuti, ma xe sta on ben tanpinare el podista, che jera anca fadiga starghe drio, elo a piè e noantri in sela.  A on bivio, l’omo se ferma. Ciano ghea vu modo de studiarlo par ben: “El ga do ganbe cofà on scalon da fighi - el sentenzia - mai visto uno caminare cussì sguelto”. “Mi vago a sinistra - el ne anuncia el pertegon, ormai deventà sinpatico anca al Mestro - e valtri ’ndè a destra. Passarì in parte a ’na casa sbandonà. Su par lì e po’ no podì sbaliare. A la prossima”. “Grazie….”, ghemo dito volentiera, tuti in coro. El sentiereto continuava streto e in salita, pien de erbazze moje, ma pi vanti el s’à slargà, deventando ’na spece de mulatiera, col fondo pien de sassi grossi e poco fermi, in salita. Semo passà in parte a la casa sbandonà, segno ca no ghìvino sbalià strada. La cartina no ne gavarìa jutà, parché ghe manca on capitolo, quelo del luogo. Sassi, po’ oncora sassi e salita, diffìzile proprio parché el jaron no staséa fermo al passajo de le roe e jera fadiga stare in calìbrio. Manco male che se viajava, za da dopo la casa sbandonà, in mezo a on bel bosco misto de fajo e pini, col sole che filtrava e zugava disegnando mile onbre. A ocio e crose a jèrino pi alti de San Francesco, quindi o prima o dopo ghea da èssarghe anca de la dissesa. Difati! De colpo, ’na goba e po’ ’na dissesa da sbalo. I sassi jera senpre pi grossi, co de pi inquercià de foje. On spetacolo. Ciano la ga fata a piè, come che ’l xe bituà a fare in Rhajastan al posto de ciapare el treno.