Dìsi quelo che te vuò, ma le istruzion del professore le xe sta parfète. Dopo ’vere catà el porteleto, da vèrzare e sarare sùito senò scanpava le vache, el trodo jera proprio de erba: “Vi toccherà seguitare pedonalmente…”, el ghea dito. On bel gnente, pedonalmnete a piè! Fra boazze, sassi e erba alta la xe sta ’na bela struma, ma solo Ciano xe desmontà, bituà a Singapore dove che no ghe xe erba, ma solo boazze. La fadigà pi grossa, a parte spedalare so l’erba che xe on laóro pesante come inpastare la malta co la baìla, la xe sta schivare i sassi e le boazze. Par el resto dovìvino ringraziare el professore, che ’l ne ghea avisà de ’nantra strada, pi fadigosa e “molto meno interessante, paesaggistacamente aromentando…”. On indijeno, che ’l tendéa le russe so l’orlo de la corte de casa soa - che insieme co ’nantre do la ciapava el nome de Contrà Rollo - ga messo tuti de vena bona disendo che, sì, par de là se ’ndaséa a Tinazzo. No la xe sta longa, anca senza magnare gnente, che Renzo no ghe pensava de intronbonarse oncora de pi: difati, jera za el quarto dì de viajo e al pòvaro toso no ghe jera gnancora riussìo de svudàre la trina. Roba che se ghe càpita qua dessora i montanari ghe fà causa par verghe ruinà el racolto de erba par le prossime tre stajon. Fora dal troduòlo de erba, a ogni modo, ghe jera on bel sterato, batù, in salita co pendenza da rìdare e co ’na bela vista so tuta la valatìna che ’l traversava. Ghe jera on silenzio tuto da scoltare, roto solo dal zigo de arquanti osèi che Renzo - esperto de falchiti vari - el jera indeciso s’i fusse àstori, falchiti, pojane, avoltòji, succiacapre, grifoni, nibi reali, aquile picole, , oche… “bisognarìa ch’ i se calèsse e ca ghe vedesse le pene”, el ga dito a la fine de l’elenco, sicuro che tuti gavarìa capìo che sorte de dubio che ghe rumegava inte ’l zarvelo. Fortuna ga volesto che no i s’à calà, senò, chissà...