Lessinia 2008...2227 agostoRossocoRosso

   In du minuti el saliton, deventà disseson, el finisse da nuovo so la sbara. Lì in parte, a la nostra sinistra, ben sconto e senza gnanca l’onbra de ’na indicazion seria, ghe jera el vargo de erba: diese metri in curva e po’ sùito el sentiero, in dissesa, de la Fontana d’i Alpini. ’Na esperienza unica! Renzo, spavaldo come al so solito, passa ’vanti, butàndosse senza retegno. El Mestro, drio, che ’l ghea anca elo ’na oja mata de provarse so chel sentiero. Tomaso a roa. Xe sta on àtimo rivare al dunque: a tiro de la fontana el trodo, za pien de sassi e tanto pendente, deventava tuto on pieron, co tri scalini spanpanà de jara grossa, “pendenza ‘torno al 35%”, diséa el strumento in dotazion. Dopo l’ultimo scalin, sassi movisti che rendéa mòrbio l’arivo de la roa davanti, ma anca par gnente sicuro. Renzo, za avanti de vinti metri: “No butarte, spètane…”, se racomanda el Mestro. Seeeeeh, el speta! Zo a rota de colo, co l’adrenalina che lo faséa uchelare come se ’l se ghesse sentà sora on bresparo. Xolà...! Passa anca Renato, corajoso, ma manco mato: primo salto, secondo salto, la roa davanti tira on tremolon: “Te magno - dise el toso - te fago su…”. Al terzo salto la roa davanti se cala sol mòrbio, cioè la se fonda, par un àtimo, so la sassara. Toca stare su de sela e cussì el pericolo de scapotamento el cresse. La velocità, bassa, la xe a ogni modo quela justa par no cèdare le arme. On zigo par la vitoria e el pi xe fato. Renzo xe za sparìo da la vista: xe passà on àtimo e on sècolo insieme. Tomaso, se savarà dopo, el decide de fermarse a bévare a la Fontana d’i Alpini: “A ghea sen - el dirà - e me paréa ’na ofesa ai cadutri de tute le guere no fermarme par on pensiero riconossente”. Fare tuto el resto del sentiero, tuto ruspante, eh, che no se creda, el xe sta on àtimo. Renzo spetava in crosara col Vajo de l’Anguilla. Bisognava córare zo, al ponte, che staltri no saéa ca ghìvino sbalià strada e perso, cussì, vinti menuti. I ghe jera, pore stele, ch’ i spetava, co passienza. Da lì, solo sfalto fin a Bosco. Dove che Renzo e Tomaso xe rivà mez’ora dopo, par colpa de ’na foradura. Cussì i ga dito...
Casella di testo: Come ogni altra sera, se ghemo fermà in paese par gustarse ’na bireta. Stavolta, noantri tri intrepidi, a ghìvino anca da contarghe a staltri du de la goduria de la dissesa. La bicicreta rossa de Renzo, intanto, la s’éa messo a tugare co ’na fafà de gerani del so stesso colore: rosso co rosso, sta ben, xe sicuro! La facia stratolta de Tomaso la dise longa so ’sta jornata: ’na fadiga, on insogno, on sbalo! Doman laorémo da ’nantra parte... Stratòltoma contento!