Drio tuta la strada, ma anca fin che ’l magnava la so razion de pan, fromajo de malga e lardo, el Mestro ghea on rùmego, on pensiero che ghe bagolàva in testa. Ghe jera da rivare fin al bivio del Piòcio;

   Int’on secondo el grupeto ga catà el sentiero par tacare la dissesa. Tuti tri si’ò ricordava belo e in dissesa, visto che a l’andata el jera sta belo e in salita. Che verità! El jera anca longo, el trato par rivare fin a la sbara, longo che e tuti no ghe parea gnan vero de ’verlo fato in suso. Che spetàcolo, però. Strada rota, calche malga, le piere a strati de la Lessinia, calche macia de àlbari e prà. On sbalo. Longo, ma el xe finìo presto, come tute le robe bele. Passà la sbara ghe jera da ciapare la strada a destra, no quela a sinistra che la pontava verso la malga Lessinia. E via, su par la strada a destra. Su… Nissuni se ricordava de èssare vegnù in zo, el dì prima… Ma no ghe jera altre strade.  E la jera càncara, anca, la salita. Dopo arquanti tornanti, disemo dopo otozento metri, vien i primi dubi. “Renzo - dise el Mestro - ma ti te ricòrdito ’sta strada?”

donca so la strada de la Malga Lessinia, anzi, poco distante da quela. E poco distante dal bivio ghe jera el sboco del sterato fato el dì prima, quelo che vegnéa suso dal vajo de i Modi, quelo co la fontana d’i Alpini. Ghe jera restà - ma no solo a elo - la oja de farlo in dissesa chel sentiero, cussì càncaro in salita. El sarìa sta on sbalo. Ma, ghe jera on ma… Ciano el fifotava che el so polso no jera tanto par la quale. Insoma, sto rùmego ...rumegava. Al bivio del Piòcio, tuti presenti, salta fora Renzo. “Mestro - el ghe fà - ghemo fato ’na scomessa: ti, al chiosco-ostaria del Passo Fittanze te ghe dito che te darìa fastidio ’ndare basso pa’l vajo de i Modi… Ciano dise che, invezze, no te vidi l’ora”. “No sò come fare a dirlo - risponde Renato - mi a farìa carte false pa’ ’ndare zo par là. Ma ghe xe Ciano, e cussì…”. Ciano, alora, contento anca de ’vere indovinà el desiderio del Mestro, el vien fora co on colpo de generosità che solo elo xe bon: “Mi vago zo par la sfalto e valtri fè quelo ca volì”. “Mi - ghe risponde comosso el Mestro - me piasarìa, ma no da mi solo”. Insoma, la xe ’nda che Giuliano ga fato la scorta a Ciano e staltri tri ga sièlto l’aventura, parfin Tomaso che le dissese fastidiose ghe fà vegnere le paturnie. “Alora se catemo al Ponte de l’Anguilla”. Dito e fato. I du grupi se assa. E qua vien contà solo le aventure del grupo d’i tri temerari senza macia.

Inpossibile sentire le rason de Tomaso, restà indrio a fare da coa. Renzo no se ricordava de la salita-dissesa, “ma, te sé - el dise - qua no xe fàzzile conóssare…”. Spetà Tomaso, che anca elo ghea d’i dubi, i tri fà ’nantri tresento metri, finìi so na spianada. De sicuro ghìvino sbalià strada. Ma dove? Renzo se ofre de domandare a ’na pastora, che la jera tresento metri pi in alto, drio parare na vaca co dele tete cussì gunfie de late che la faséa fadiga de caminare. Intanto, el Mestro, molà del liquido inùtole so l’erba, el studia la cartina. “Catà el sbàlio”, el dise. “Renzoooo…”, ma l’è massa vanti. Zo, a la sbara, cognava ciapare par la spece de vargo de erba che se vedéa, quelo si, a destra, no la strada. Se ga da tornare indrio, par forza. Co’ sarà tornà indrio Renzo...