I ga sfaltà ’na strada cussì bela che bisognarìa
farghe causa al cantiere. E anca al Signor Sindaco...

...Ma noantri no podemo farghe gnente, anzi, xe proprio par lì ca dovemo passare. Proprio di fronte a la baraca-chiosco-tratoria del Passo Fittanze (galantòmani a no farghe pagare a Renzo la bireta che - ga dito elo - jera sta roessà dal vento. Figùrate…), parte el trodo par el bivio del Piòcio, so la strada che va su da Erbezzo a Monte Castelberto. La chioschessa-trattoressa ga anca dito quanti chilometri, ma nissuni la ga scoltà e tuti s’à messo de bona vena in sela. Salita, ma dolze, 5-6% secondo el strumento da reoprani de Renzo. Quelo che nissuni se spetava xe che la strada fusse sfaltà, par via che so la cartina nuova de trinca del Mestro la jera segnà rota. El paesajo el xe, a ogni modo, on spetacolo. Semo tuti d’acordo che el sole staga on fià fora da i piè, ca ghe n’emo za ciapà abastanza, oncuò. E difati, arquanti nuvoloti co aria bonazzona, s’à messo in mezo: gnente costiera, ma - par efeto colaterale, come le medesìne - se sta ben co indosso la jachetela. A Giuliano ghe vien el morbin e cussì el Mestro ghe toca starghe drio e assare al so èssare staltri tri, che po’ uno - Ciano - el xe ’nda in fuga meténdose fra i du davanti e i du che tendéa el dedrio de la procession. Prima in mezo a on pra senza àlbari, po’ - man man che se ’ndaséa suso - arquanti pini tegnéa de ocio tute le curve e i murazzi missi zo par no fare rugolare in strada le boazze. Forse...

Ghe ga volesto squasi zinque chi-lometri par dàrghene fora e rivare a chel benedìo de bivio, a 1.568 m. Che, paraltro, el xe lì da chissà quanti ani… Fin che ’l Mestro se incarica de no far morire de sen l’erba, in atesa che riva i paruni de le retrovie, Giuliano vien ciapà da ’na bota de slanguóre e, cussì, inbrancà el telefonin, el se perde via mandàndoghe on messajeto a ...chi che sa elo. ’Na vaca, so le vicinanze, la s’à voltà da staltra parte par no confóndarghe le idee e par rispetare la so privacì. El podarìa scrivare de le cazzade e po’ dovérsene pentire. L’arivo de la coa del sarpente vien festejà da tuti co du morseguni al pomo in dotazion e ’na bela siàda de aqua de la boràcia. Occhèi!