La meridiana no segnava l’ora, parchè la jera a l’onbrìa, ma la sveja de le bicicrete sonava le ùndese e calcossa. Bisognava partire, e cussì xe sta fato. Dai Gaspari la stradeleta sfaltà la se buta so la provinciale che mena a S. Giorgio, larga, ’pena sfaltà, in bona pendenza, ma par gnente adata a la lena de i zinque cavalieri. Alora, fati tri chilometri fin a on posto che se ciama Pàrpari, ghemo catà on bel sterato - anca quelo sfaltà i primi dosento metri - che, viste le carte, ne gavarìa portà par traverso malghe e pra, sempre a S. Giorgio.

   La se ciamarìa mulatiera, ma la va su dolze, in tera batù e jarà, co de l’erba in qua e in là, oltre a tante mosche, tute - però - indafarà a fare ovi so le boazze sparpajà dapartuto, come se le fusse sta somenà aposta. Ghe xe on bel toco de salita che passa vizzin a on strapionbo che fà védare ben el fondo vale, dove che ghe xe Giazza, che visto da lì el pare on presepieto. ’Na sbrancà de case so ’l culo de on fosso, come se le fusse del pesse frito inscartozzà. El trozo, ogni tanto, el passa par ’na malga e po’ par ’na stala e po’ in mezo a le vache. E ogni tanto ghe xe on palo che sbara la strada, co tanto de “par piacere sarè dopo èssare passà”, i ghe dise a chi che passa a piè o, come noantri, in bicicreta, no a le vache. Cussì ghe xe Giuliano e el Mestro, mandà dai capi in avanscoperta, che ghe toca el conpito de vèrzare le sbare, po’ ghe xe Tomaso e Renzo, on fià pi indrio, che ghe ne aprofita e i passa e Ciano, restà indrio par via de la roa davanti col fren tirà, che ghe toca l’onore de sarare la sbara.  Fin a S. Giorgio ghe ga tocà zinque volte.

   No la xe sta tanto dura rivare a S. Giorgio, anca parché l’ultimo tòco - squasi on chilometro - el xe in dissesa, dolze anca quela. Da distante se vedéa la curva dove che tacava la dissesa, e da staltra parte ghe jera zente che vegnéa su, in senso contrario al nostro. Se ghemo incrosà proprio dove che ghe jera el canbio de pendenza. Do copie de anzianoti sui zinquant’ani, co de le bicicrete derucà, le so fémene a piè che le pantezava, caminando co de le scarpe tipo papusse da saloto. “Sa - ga dito una - sìpiano la prima volta ca vado in bicicreta su per di quato e anca giù per di lato”. Stè casa, che xe mejo, ga mastegà Giuliano. Renzo sarìa sta pì cativo, ma ’l jera indrio, par via del fren moderno a disco che ’l tacava...