Jera tenpo de montare in sela, e cussì xe sta fato. El sentiero - on bel stradon largo, pien de sassi, ma belo - el partìa sùito in salita. Nissuni se lamentava, anca parché poco pi vanti se vedéa che ’l canbiava pendenza. Difati, dopo poco manco de on chilometro el ga tacà a ’ndare in zo, e belo pendente. No ghe jera ànema viva so chel trato e cussì tuti quatro i cavalieri - Tomaso on fià pi chieto - se ga butà zo, par gòdarse ’na s-cianta de sterato veloce. Ocio, però, parché no ’l jera farina da fare ostie. La roa davanti la saltava par ben, parché i sassi del fondo i jera movisti e bisognava tegnere ben in tiro el morso del cavalo. Ga volesto poco par rivare a San Giorgio, el paesoto finto e bruto ca ghemo za dito so le prime pàjine. Da lì, passà el piazza- loto sterà, ghemo ciapà el carezon che portava su, alontanàndosse da la sfalto, che gnan védarla! Ghe jera ’na sbara da vèrzare e da sarare, ma ormai ogni uno saéa cossa fare. El dì prima, fato in dissesa, chel toco el paréa pi curto, e invezze… Giuliano e el Mestro ghe ga tocà fermarse a pissre on par de volte par no farghe torto a staltri du, persi - forse - a vardarse oncora torno. De tuto sto ingalozzamento Giuliano ga dà el merito a ’na cingoma, mastegà una elo e una el Mestro, in prinzipio par fare on fià de salivo in boca. No jera previsto l’anti dopings a l’arivo, cussì no se savarà mai so cossa che jera sta tocià sta cingometa. Finìa la salita, verti e sarà ’nantri du, tri sbaraminti, a la fine del sterato ghe jera da nuovo la sfalto, ai Pàrpari. “Tomaso?”, domanda el Mestro preocupà che ’l toso tardava. El ghea domandà arquanti fazoletini a Renzo,  chissà, forse par supiarse el naso. Dopo diese menuti boni, in pensiero anca parché ghemo visto ’ndare in su on cagnazzo moro, lo ghemo visto rivare co on soriso da ’na recia a staltra. El ghea loamà el pra: “xe mejo ca ’ndemo via in pressa - el dise pena rivà - che se i la cata i me fa causa! L’invidia de Renzo se lezéa direttamente so i so uciài. Via de fuga, alora, in pichiata verso i Gaspari, a la volta de l’albergo Picola Mantova  de Boscocesanuova.