Vedendo el colega che fotografava tuto intorno, anca se ‘l ghea dito che lì el ghe vien spesso, ne xe squasi vegnù le làgreme a i oci: quanto xe che se pole volerghe ben a on posto cussita? Assè, de sicuro… E alora, assà partire el finto santarelo (finto, parché el jera drio ’ndare a la malga Lessinia par védare la bela tosa, sto buelo, che ’l jera maridà, anca…) i quatro da l’ànema sensibile i decide de fermarse tri menuti, par darghe ’na ultima ocià a chel mondo, prima de ciapare la salita. So la destra - se vede so la fotografia dessora -  tuta la serie de panetuni co, sol sfondo, la strada pena fata e on paro de le milanta malghe che ghe xe dapartuto; Chì soto, el grupo del Carega, a

confin co la provincia de Vicenza e, apena in vista, el stradon che ne gavarìa portà a San Giorgio. La testa no se decidéa da quala parte vardare par ultima, fin che i oci se inpenìa de tuto quelo che jera possibile vardare. Renzo el jera senza parole, ma el pensava de sicuro quanto belo che sarìa sta - come omajo finale a sta belezza de tera - assarghe lì on so ricordo personale, biodegradabile però e, quindi, senza dani par l’anbiente. El zarvelo gavarìa volesto, i oci ghea za visto de drio a quala piera assare zo el fardelo, ma el pantazzo no ga risposto a l’apelo. Pecà: a le vache no ghe gavarìa disturbà de sicuro e par noantri la sarìa sta ’na liberazion dal pensiero del tsunami in aguato. On ultimo pensiero, ’na ultima ocià, on ultimo saludo a chi’a montagna incantà. “Alora?...”, prega Renzo. Gnente!