Anca volendo, no jera possibile fare chel toco de strada - squasi sete chilometri - senza mai fermarse. No par la fadiga, che ‘l jera tuto in dissesa chieta, ma par le maravéje che l’ocio ghea da vardare, tuto torno, davanti, dedrio, a destra e a sinistra. Bastava volere. Calche boscheto in lontananza, e pra tuto intorno, a gobe, co ogni tanto on lagheto tondo, fato aposta par le vache. Quelo de la fotografia chì in parte el xe uno d’i tanti. On spetacolo

che par  fissarlo in testa no basta la machina fotografica: ghe vorìa ’na spece de uciai, fati aposta par l’ocasion, che registra diretamente sol zarvelo, par fissarghe drento tuto chel bendedìo. E la strada la passa in costa, come se chi che la ga fata el ghesse bu inamente proprio de vardare tuto par ben, passando. Massa in pressa, anca fermàndosse, a semo rivà a Podestarìa. Invezze de farne bela ziera, l’omo-che-se ghea-smagrà, apena ca semo ’ndà drento par ordenare el cafè, el ga ciapà de peto Giuliano: “ma, valtri - el ghe fà senza gnanca on fià de rispeto - sìo oncora qua? No ghi mina gnente altro da fare?”. Giuliano, che al so banco al marcà nissuni se parmetarìa de parlarghe cussì inte ’l muso, el xe restà senza parole, ma po’, vedendo che el tizio el ghea in man on quarto de crostata co i mirtili, el ghe ga risposto par le rime: “Vu, sior, sa continuè cussì st’ano che vien ve catemo gunfio cofà una de le vache che bàzzica qua torno…” e lì la costion s’à finio. Dopo bevù el cafè - on te, par el palà delicato de Tomasin - se rimonta in sela, parché ghe xe oncora strada da fare. Intanto el dente de tresento metri, in salita càncara, che porta da nuovo so la strada. Fato. Po’ cogna continuare fin squasi soto al Monte Tomba, dove che ghe xe ’na deviazion che ponta in alto par rivare - proprio tolendo el giro del Monte Tomba - a San Giorgio. Da chela strada vegnéa zo on colega, da l’aria on fià sfigà. “Vago a la Malga Lessinia - el fà - bevo el cafè, me vardo la bela tosa che ghe xe là e po’ torno indrio”. “Conossiemo ben el luogo - ghe dise Giuliano - a la tosa l’ano passà mi a go mostrà el cicio…”. Par tuta risposta, el colega s’à messo a fotografare el panorama. Ma, a ocio, solo par scóndare na bruta espression schifà...