Par rivare al Monte Castelberto, ghemo dito de èssare passà par la Malga Lessinia. El xe on posto che merita on discorseto a parte. La xe ’na malga come tute staltre, cioè ghe xe le vache e i fà sol posto anca el fromajo. In pi, par la fortuna de èssare so ’na strada de passajo, la dà ai pelegrini afamà la possibilità de becolare calcossa. Le do famejole de veronisi ca ghemo catà a tola so la veta del Monte Castelberto, dopo ca ghìvino finio de barufare so chi che ga inventà i gnochi, a proposito de gnochi: “Dovì a tuti i custi ’ndare a magnare i gnochiti cinbri a la Malga Lessinia”, ne ga dito la sposa pi fastidiosa, “ i xe calcossa che no se desméntega. ’Ndando in suso a se ghìvino fermà so sta Malga,

senza savere d’i gnochiti cinbri. Ghemo fato ’na picola sosta par sgagnare arquante nose brasiliane, piene de calorie, e par studiarghe sora al resto del giro; no ghemo butà l’ocio drento a la Malga, parché no jèrino intaressà. Solo Giuliano ga tentà de convìnzarse che jera el caso de darghe ’na ocià: “No se sa mai - el ga dito - podarìa èssarghe la cicrista de l’ano passà che de sicuro la se ricorda de quelo ca ghe go mostrà fin che la passava…”. El ga ciapà da maurno da tuti staltri in coro, fora che da Ciano, che ’l ghea rinuncià al viajo. Lì, ghemo vu anca la possibilità de visitare on bel capitelo dedicà a la Madona, co on bel portegheto davanti. So ’na parete del portegheto ghe xe disegnà-scrita ’na poesia che fà ingropare, messa in musica dal visentin Bepi De Marzi: IL SIGNORE DELLE CIME. Da lèzare, ma mejo oncora da scoltare sta canta: la te fa cavàre el cuore! Ma anca la boca vole la so parte. E alora? Alora, sentìo da la sposa veronese che in Malga se magnava i mejo gnochiti cinbri de tuta la Lessinia, partiendo par Monte Castelberto i quatro, a nome anca de Ciano, ga fato voto che el vènare drio, prima de introdarse pa’ ’ndare casa, i sarìa ’nda tuti insieme a sajare i gnochi.