A squasi le do gavarìa vu fame chiunque sìassi, inmaginémosse quatro atreti de meza età, co tuta la salita fata insieme co la so panzarela, anzi, strapegàndo la so panzarela. La fame faséa novanta. El sole se ghea sconto dedrìo de la solita nuvola, justo par ronpare i bisi e costrìnzane a métarse la jachetela. El pranzo previsto el jera on panin co la mortadela, on pometo e - par chi che ghesse volesto - ’na sbrancadela de megole varie. Sol posto, el pianoreto del Monte Castelberto, ghe xe do tole co do banchete, a uso piche-niche, ma le jera ocupà da arquanti anzianoti co tanto de sposa al seguito. Piene de parlantina, le spose, e ingalozzìe a védarne rivare noantri. No te digo co’ le ga sentio el profumo de la mortadela. Le ga tacà a ciacolare come de le mitralie, fin che el discorso xe cascà sui gnochi. Le jera de Verona, e quili de Verona i ga la pretesa de ’vere inventà i gnochi. La xe sta sùito barufa quando che el Mestro ga riferìo che a elo ghe risulta che sta piatanza sia sta inventà dai veneziani. A ogni modo la discussion ga servio parché le se alzesse e le ne desse el posto, ca ghìvino oja de ponsarse. Da lì la vista, anca col sole che no voléa savérghene de farse védare, la jera on incanto, a 360 gradi. Poco pi in suso de le tole, ghe xe on posto fato come on pozzo: te ghe vè drento e, lezendo so la veriara de sto pozzo, te vidi e te conussi tuto quelo che ghe xe ’torno. Na spece de carta geografica co la frecia che ponta ora verso el Garda, ora verso el Carega o verso el Monte Tomba, e via discorendo. La xe sta ’na tapa culturale e anca solo cul, parché el Mestro xe sta costreto a zercare on fià de privacì par rispondere a on brontolamento de panza inproviso, co l’invidia de Renzo che, de solito, el caga a “scopio ritardato” e dopo jornate de intasamento, metendo in pericolo chi che ghe sta arente. Semo riussìi a darghe rason a le do spose, contente che ghe sia sta confermà che i gnochi jera sta inventà a Verona. Fato tuto

quelo che ghe jera da fare, rivolto on pensiero a Ciano che ’l gavarìa sostegnù che i gnochi jera sta inventà a Hon-Kon, se rimetemo in sela, justo in tenpo parché vegna fora da nuovo el sole. Grazie. In dissesa, stavolta, verso el bivio de Castelberto e direti a la Malga Podestaria par sorbirse on bon cafè fato co la Faema a carburo del mileotozento e sùpia. Drio la strada, on sterato da fola co ’na pendenza in dissesa apena bona par no spedalare, ghe jera on stravento de vache, arquante stravacà, che solo ele xe bone de farlo ben, altre co le zate a moja so on lagheto e altre oncora drio spilucare l’erba del pra. On fis-cio, forte e inproviso, ga fato fermare de colpo Renzo: “Tusi, ’na marmota”, el se inventa, come se ’l fusse esperto de fis-ci. Ma la jera proprio ’na marmota, de guardia pena fora de la tana, drita, atenta, ferma. Bela, assè.