Ogni giro che se rispeta taca, de solito, co calche problema. El primo a rognare el xe Giuliano, che ghe pare de ’vere on fren tirà, so la roa davanti, quelo a sinistra. Xe vero, sentenzia el mecanico uficiale del giro, el Mestro. Ghe vole on gesùmaria a tirare fora i feri, a farghe ’na visita al malà e a catare la cura adata: mezo giro a sinistra de l’aposita videta e tuto va a posto. Intanto Renzo, a tasando, el ghea za fato dani, zercando de justare i so freni moderni a disco, elo, bituà solo co le television… Che zente!

   La stradela che da San Francesco - on paeseto de dosento àneme - porta ai Gaspari la xe sfaltà, ma no la xe traficà, anca parché no la porta tanto distante. El verde che ghe xe tuto torno cava el fià, da quanto belo. Ciano no xe d’acordo e, bituà a comandare come che ’l xe, el da órdene che el fià el manca par via de la salita. Bisogna perdonarlo: on comerciante a l’ingrosso de cazzade inportà dala Cina come elo no ’l pole ’vere l’ànema de on poeta… El gropeto de case de i Gaspari el xe deserto, ma, visitandolo par ben, el assa intèndare de èssare vecio de almanco tre o quatrozento ani. So una, tirà a spago chissà par che prezzo, ghe xe ’na meridiana, a l’onbra, che la ga ’na bela scrita par ricordarghe a tuti come che fà el tenpo a passare. La dise, sta scrita: “El tenpo el passa, la candela la brusa”. Semo in zona Cinbra, ma le parole xe scrite in dialeto s-ceto de Verona, conpagno del nostro, so ’sto caso. El posto, a ogni modo, el xe bon par tirare on poco el fià; sol caso de  Ciano, el fià xe infumegà da ’nantra sigareta.

...anca Ciano, che ghe taca el fren davanti, anca elo come a staltri. Che la sia ’na spece de malatia che se ciapa? Se la fusse cussì, Tomaso e el Mestro pare ch’i sia sta vacinà, parché i so freni va che xe ’na maravéja. I malani del fren moderno davanti a disco de Renzo i pare seri e cussì la sala operatoria la vien prenotà par la sera, a fine giro. E dopo ’na visita lanpo del primario, la stessa decision la vien ciapà anca par el fero vecio de Ciano. Se parte cussì - xe d’acordo anca staltri - che anca se la roa no gira a puntin, no fà tanta difarenza. Intanto Ciano ga za fumà la seconda sigareta, par farghe da suporto al narvoso del mecanico. Dai, su, a cronpare la marenda: du fruti e on panin.