Chi che no ga visto l’inferno no pole savere come che xe fato el diavolo. Qua vale el discorso contrario, parché se parla de Paradiso!
   I alti Monti Lessini, on posto che pare conossìo solo da le vache, tante ghe ne xe che le pascola pacifiche, ’ndando de sbrinzolon in qua e in là, su e zo pa’i pra che se core drio uno co l’altro. Qua dessora le montagne le pare tute torte, fate co on caìn come stanpo, incolorìe de mile sfumadure de verde, senpre rasà e loamà al naturale da ...l’erba che le bestie assa in giro dopo ’verla rumegà, senza vargogna parché no ghe xe vargogna so ’na natura fata cussì, che da na parte la fà loame e da staltra late!

   Le nostre bicicrete no le assa ruare, no le fà fumo e gnanca confusion; le nostre ganbe frize soto el sole, che ’l ciama fora el nostro suóre e po el lo suga anca, assando on segno rosso al so passajo, come ricordo.

   Le nostre vene no le porta solo el sangue, ma anca tuta l’emozion de on viajo fato fra pra e zielo, co milanta vache come testimonio, co solo el venteselo fresco de i mile e squasi otozento metri de altezza come colona sonora.

   On falcheto, na pojana, na marmota, le vache e noantri, saldi in sela, mai stufi, senpre in tiro.
   E senpre atenti a no pestare calche boazza.