Proprio in parte ala pista dele forme passava on steratin coi fiochi, sùito inpirà dai zinque intrepidi par traversare i du tri chilometrI che restava par rivare ala forteza de Verrucole. El castelo se vedea in alto da distante, fra la vejetazion che inboscava la costa del monte. El sentiero jera solo sconesso, ma no fadigoso, salvo l'ultimo toco che'l jera in salita da sbochi fin al limite dela piaza del paeseto. Calchedun se ga vergognà de presentarse dessora, in piaza, co la bicicreta a man, ma no jera possibile fare altro vista la situazion.

La salita al castelo xe sta incredibile. Ghe jera on sentiereto—al'inizio la parea na strada - che pendea come na scala, largo poco pì de on metro e pavimentà de ciotoli tundi, spacaganbe. E in pì no'l finia altro. Daniele, Claudio e Renato lo ga fato in apnea e in ponta de sela; Renzo lo ga fato; Leonardo el ga fato chel tanto che'l xe desmontà. La vargogna del quinteto. E Claudio,  che tuti credea che'l ghesse on fià de retegno, el xe sta costreto par el gran sforzo a molare na pissada mai vista. Fortuna che ghe jera uno che lo ga fotografà, senò no ghe credaria nissuni. Par farse perdonare el ga invità tuti a na visita guidata al mastio,  la parte alta del castelo, dove che ghe stasea i capi.

El diario de sto dì no calca tanto la man sol fato che ghe manca du eleminti dal mucio. No sarìa delicato, pore àneme: uno zoto e scaltro via de testa! Ma xe parché no i ghe jera che no i ghe xe gnanca so la fotografia chi in parte. Ma 'ndemo co ordine. Finia la visita ala roca de Verrucole, condia co on fià de sole e on fià de carburante da  stomego, el grupeto se ga butà in dissesa par rivare in pressa al paeseto de S. Romano, frazion de Piazza al S. Jera consilià na visita, anca se via sfalto. Mai consilio xe sta pì intelijente. El borgo xe picolo, ma conservà come on cofaneto de perle. La comitiva se ga divertio a 'ndare su e zo par le stradete che a ogni angolo le ofria on cantonzin infiorà, on balcon pien de vasi, du scalini de piera, na porta de legno stravecio; tuto conpagnà da piera sola strada, piera sui muri, piera le scale, piera ...el mondo. On spetacolo. Uno d'i zentosessantadu abitanti del luogo - cussì ga dito elo - el xe sta ben contento de fotografare i zinque marajuni, che ghe brilava i oci , soto uno d'i porteghiti del posto. Tornare al'albergo dopo na vision conpagna xe sta la pì bela fine del giro e anca del viajo nùmaro 9 del domila. Làgreme...