Ora partenza        8.35

Ora arivo               12.15

Ore de sela            2.35

Tenpo totale         3.40

Totale Km.            27.7

Velocità  max       55.3

Velocità media     11.4

Foradure               NO

Quota massima     715

Asfalto %              70

Sterato  %             30

Piova                      NO

Par dire che uno xe sfigà, da desso in avanti se dirà "Luigino". Ben: dopo zena, la sera del viajo a Lucca, la conbricola se senta fora dal locale, a fare quatro ciacole. Luigino se aparta par telefonare ala morosa e, dopo vinti minuti di cìo-cìo, el se alza proponendo de 'ndare a bévare on cafè in centro. Parlando el va zo dal marciapiè e, ciapà da on colpo de taresina, el mete on piè sol bordo dela strada: crack, se ga sentio, e ahi, se ga sentio, e anca porc..., se ga sentio. Diagnosi: distorsione tibiotarsica con sospetta lesione del legamento controlaterale del malleolo esterno destro dell'avampiede sinistro. Prognosi: doman no se viaja. Terapia: fasciatura tipo Desault e impacchi. Questo la sera del 31 Agosto. La matina drio l'omo vien zo co na caecia gunfia e mora, conpagnà da Oscar coi oci gunfi e on gran mal de testa. El consilio decreta l'imediata istituzion del lazareto par i du co l'ànema sui cavaliti. Decision sucessiva: vista la scarogna del dì prima, se parte par on giro curto, par sfrutare la jornata speciale che se presenta. Pecà par quili che resta, che però i ga l'incarico de spetare.

Xe sta necessario zernire on giro curto, ma belo. Dito e fato. Su par la salita del zimitero fin al bivio, visto el primo dì, verso Cogna, on paeseto postà sola costa del monte de drio de Piazza al Serchio. La jornata jera on spetacolo, co on sole vivo, el cielo de on celeste mai visto e on'arieta frizantina che metea el morbin. Za questo bastava par far belo el giro. Fin a on toco vanti la xe sta tuta sfalto, esatamente fin a tiro del zimitero de Livignano, co l'ingresso inpedio da na ruspa del cantiere che justava la strada sterata che el grupo dovea ciapare. Su par lì, alora...

No xe sta difizile scavalcare la calà, che poco dopo la diventava oncora de sfalto, e gnanca oltrepassare el borgheto de Valle, gnan visto da quanto ...inesistente che'l jera. E passare par Carpignana Vecchia (do case dirocà e i resti de na ceseta, ormai invasi dale erbaze) e po' par Carpignana Nuova (do case come so quela vecia, ma nuove, squasi...). El paese dopo el jera Orzaglia, che la guida lo dasea famoso parché ghe xe la pista del "tiro dela forma", sport olimpico del posto che'l consiste so na gara par tirare pì distante na forma de pecorino stajonà. Al monumento ai du caduti sola prima e ai tri sola seconda guera la marmaja se ga fermà a magnare on pero e na banana, justo par gradire e par sentire le lagnaaze de on vecioto del luogo: "Mi vago stare via; massa trafico, qua!". Par noantri el jera on paradiso de silenzio e de pace, rota da arquante efusion de Claudio e Daniele, senpre in gara co'a tronba.

L’interno del castelo de Verrucole (anno 1.027)