"La note ghea preparà la matina. On tenporale drio l'altro durante la note ga tegnù sveja tuta la stala, fora che 'l Mestro, senpre stropà dai tapi. Tute le danze dela piova ca go fato ga dà finamente i so fruti, tanto che anca la matina, a ora de supe, piovea. Decision imediata: se va a Lucca, distante solo 62 chilometri. Solo... Fangùlo. Fata la curva dopo el ponte sol Serchio, pena fora del paese, on temporale che s'ea ciapà indrio la note se ga scaenà sole machine in dotazion ala ciurma. Mi a viajava co Luigino, anca elo pien de corajo. E come uno che fuma cofà on turco, che'l se taca na sigareta co la cica de quela prima, cussì el primo tenporale ga assà posto al secondo e po' al terzo, e cussì via, drio tuta la strada. On diluvio, le catarate del cielo verte apien buso che le se

roessava sole machine. Da destra e da sinistra l'aqua la traversava la strada, e ogni dosento metri la ghea on colore difarente, quelo dela tera del monte. I tergicristali no ghe ne podea pì e chel maurno del Mestro, davanti, parché no'l se ferma... Luigino gavarìa messo aprension anca a Giobe. Dopo quaranta chilometri de diluvio, rivà al ponte del diavolo, finalmente el Mestro se ferma: no se ghe vedea pì gnanca a biastemare, come se sol querto dela machina ghe fusse uno che roessava on veturo de piova ogni du secundi. Terore, fifa, scagarela, paura de perdarse, de no tornare pì casa, de morire negà distante dala fameja, de no védare pì la me putina. La pensava cussì anca Luigino, anca se no'l ga putine. El Mestro ghea da vere el gran de

pévaro sol culo e cussì, dopo tri minuti de sosta, anca se diluviava oncora el ga vu corajo de ripartire, imità da Luigino che'l mastegava inproperie ca no go gnanca stomego de ripetare. La tortura ga continuà fin ale porte de Lucca, dove che ormai no credea pì de rivare. La vista dele nuvole che, anca se le pissava oncora, parea che le ghesse finio i liquidi, e dele mura dela cità, me ga rimesso de bon umore. Ma la ga durà poco: justo el tenpo de desmontare dala machina e fare quatro passi par le viete splendide de Lucca. Catà la catedrale e 'nda drento a visitarla, par tuto ringraziamento el paron dessora ga scaenà el finimondo. Do ore de so- sta sforzata drento ala cesa, co fora on teremoto de aqua, fulmini e tonà spacacuore. Lucca xe na bela cità!"

A cura de Oscar

fotografia de Renzo

Gitanti ingrutolii a Lucca