continua...

Par magnare, a ogni modo, i comensali ga dovesto comodarse stando tenti a no rugolare zo dal buron. Anca i cavai xe sta ligà su pa'l monte par evitare che i sbrissesse a vale. Distante, in basso, nonostate

la foschia, se intravedea on paeseto - Metello - che i gitanti gavarìa visità pì tardi. Intanto el bocon 'ndasea basso a fadiga par calchedun. Parfin Oscar no ghea parole, anzi no..." Tento, Mestro, che la to bici no la faga caolieva  zo dal precipizio." el racomandava in fil de ose. Calche nota alegra jera dà dala tronba de Daniele, che'l parea Louis Armstrong col folo pien de sòlfare. Gas fossile. Mandà zo sti roschi e rancurà le tanpeline ( manco la coega del pan che el Mestro ghea cavà via co la pinza) el trenin ga ricumizià a sbufare, stavolta sol versante oposto, col strapionbo a sinistra e na sassara malefica  al posto del'erba, pì morbia.

Qua la question la se ingarbuja. " El xe on casin caminare tegnendo la bici a destra, parché ocore tegnerla alta. Intanto le scarpe, che no le xe a mescola tènara, no le tien ben sol fondo jarà, e guai a no mi-surare i passi. Anca volendo no serve pensare de tornare indrio, e po' no ghe xe tenpo par pensare: vien in mente solo calche preghiera, anca quela sofegà dala scagarela. Quando finiràlo sto suplizio. Me vien da pensare come Oscar: saròi drio rincojonirme? Eh, no, la xe la paura. De cossa? Del strapionbo, maurno !. Te pensi al strapionbo, varda pì vanti che roba! Go la boca amara, forse parché le scorze no gà el so solito sfogo dal basso...(pensieri privati del Mestro)" Pì vanti el sentiereto se ranpegava par calche metro, sora on sponton de rocia a pico sol buron. E dopo de quelo ghe jera el famoso trato de sentiero franà. I buli davanti passa praticamente ridendo, ma el Mestro ciama aiuto, oci fissi par tera, piè incolà sol sentiereto, culo che no ghe sarìa passà gnanca on ago da ricamo. Quele jera le famose Porraie, creste de crinale messe a 1.800 metri s.l.m. Tuto fin al passajo al versante col buron a destra. Lì, basta buron. El sentiereto se slargava on pocheto, chel tanto che se podea montare in sela, jutà anca dal pendìo che no jera pì a pico, par gòdarese finalmente on fià dopo la scaga.

Anca Luigino taca godarse...

E da lì scumiziava anca la dissesa, a parte on bocon de prà messo a 45°, da guadagnarse col suòre dela fronte e de tuto el resto. El serpentelo da fare in bici el jera belo e tenico, abastanza par far desmentagare i spaurazi de poco prima. El primo a caciare urliti de gioia xe sta Daniele, scanpa zo in dissesa ala volta del'oratorio de S. Bartolomeo, on capitelo de alta montagna, co S. Bartolomeo inciavà dentro parché nissuni lo veda. El cartografo, rivà a on incrocio pien de segnali, el fà el punto: la jera la strada justa. Quelo jera el passo dela Focerella, dove che ghe jera on cipo co segnà i sentieri che partia da lì in tute le direzion. Par quelo da dove che vegnea i sete desgraziati jera sconsiglià la M.T.B. Ciapando a destra, come da guida, ga tacà na mulatiera da sbalo, pendente assè e piena de sassi: jera ora. E dopo de quela, oltrepasà nantro rifujo sprangà, na dissesa so na forestale sterà che no la finia pì, tanto longa e insieme massa curta da quanto bela. La 'ndasea ficandose senpre depì sol bosco de castagni, conpagnà dai  zighi dei magnifici sete, ormai definitivamente rincuorà. Anca se jera finia l'aqua. I xe stà i pì bei 8 chilometri ( siorsì, oto Km. !) de dissesa continua mai fati.Manubri, forcele, roe, ganbe e brazi, tuto inpegnà ala morte, ma spetacolare. Finio el sterato, dopo on par de Km. de sfalto la muta ga fato l'ingresso trionfale a Metello, on paeseto forse desmentegà da-dio, co 42 àneme residenti. Al bareto del luogo, domandà on te', el xe sta servio so sete cìcare difarenti "Non ne ho tante", se ga scusà el timido colega de Tomaso. Taresina contajosa:. Anca el Mestro, inbriago de  tè, se desmentega el quaio ala partenza... El resto no serve contarlo massa. I xe sta nantri sèdese Km. de dissesa, prima ala volta de Sillano, po' fin al'albergo dove che la mente inturbià del grupo vedea za le tre pastassute fumare. Tre paron, se intende, de pastassute. Oh, ben!

S. Bartolomeo sconto