Pissà tuto el pissabile, magnà mirtili e bevù quanto basta, i commilitoni riparte sol sentiero sterato de prima, oncora in salita, dentro e fora dal bosco de fajo. Fin che le indicazion sola carta no le se incontra pì co quele sol posto. Pararìa che el sentiero del C.A.I. 00 dovesse tacare dopo na curva larga, a 90 gradi, ma tacà a on fajo Claudio vede on segno rosso che'l dise 00. Decidare a l'umanità no se pole, parché manca Daniele, inpegnà so na discussion de confini e de muri da robaltare (el solito cantiere...). Claudio se ofre de esplorare el sentiero segnà e Lelo vien incaricà dal comitato esecutivo de 'ndare vanti par el sterato, in zerca de bivii. Gnente bivio. E anca el sentiereto 00 pare massa sconto. Morale: fangùlo, toca 'ndare a

 

 

ocio. Co l'aiuto del'architeto, ben disposo par l'esito dele beghe de confine al celulare, i sete intrepidi i decide de 'ndare su pa'l sentiereto, in mezo ai ultimi faji. "A piè...?" domanda schifà Renzo. A piè. E fu bene. Poco dopo ghe se para davanti na montagna cuerta de erba, co disegnà so on fianco on trodoleto largo 20 e fondo 15, costejà de coego traditore. Risposta dela guida: "A sì sola strada justa. Avanti par qua. Segno dela crose".

On mare de erba

in salita, ma

dopo anca na

sassara a strapionbo.

De qua e delà

del crinale, fra do

province.

La scagarela del Mestro

comuove  el  publico.

Aplausi ala fine

del suplizio.

 

 

El suplizio taca sùito. El troduolo che se presenta, come ca disivino, el jera in liziera salita. Da ridare. Renzo monta in bici, e scaltri fà come elo. No se pole pedalare, parché el coego - sto malgualivo - el xe lì pronto a ingrejare i pedai, col risultato che sia Renzo che Renato ris-cia quasi imediatamente de rugolare a vale. Soluzion: co Oscar che nele retrovie ga za scumizia a cantare el dies irae, Luigino che'l se tien a rispetosa distanza e Leonardo che no'l parla parché el s'a fato métare de corvè, staltri i se arma de santa passienza e i va vanti a piè, spenzendo a man i feriveci, tegnù sola destra verso el strapionbo. Che'l xe de erba, ma senpre a strapionbo. El trasferimento - siè Km secondo la guida - xe tuto in quota, salvo arquante zentenare de metri che el sentiero va su de bruto."Se scolina là in fondo?", domanda Renato a on grupo de pedoni che ghe vien incontro. "Sì - dise l'unico talian - ma dopo ghe xe le Porraie, 1.800 m.; e stè tenti che xe franà el sentiero". Dedrio d'i uciai da sole Robe di Kappa da cula del Mestro spunta do làgreme, par via del strucon violento che ghe dà el culo (lo sfintere, n.d.r.) ala lieta novela.

Xe gnente caminare, ma sol sentiereto no ghe xe posto par la bici. A ogni modo el trato erboso vien passà, anca se co calche aprension. Pi' vanti se canbia versante, e là scumizia i doluri. Ma questo va contà dopo marenda. Infati, finio el sentiero col coego, prima de canbiare versante dove che scumizia le roce, calchedun se ricorda che anca i èssari umani ga da magnare. Ale 2 e on cuarto esate. Panini de trachite, fati la matina dal comesso priego del supermercato in Paese. "Chel piaga de omo xelo so marìo?", ghe dise Renzo ala cassiera che se'l jera so marìo chissà cossa che la rispondea..."No, ma'l xe tanto bravo". Infati el ga fato d'i panini  co dele lastre de ardesia, da magnare col scarpelo. Bah!

Dessora ale Porraie. 1.800 m.