O ca no ghemo pregà ben o ca no se ghemo capìo col Santo, fatostà che Luigino, ala partenza dal capitelo, el gà vu on ataco de taresina. Al grido "Che ben che m'a fato sta sosta", el xe partio in tronba zo dal bosco assando le tanpeline, co quaio e tuto, pozà a on fajo. Solo l'ocio atento de Oscar, bituà a contare i caviji, ga scongiurà el disastro. Ma no l'ataco de taresina! Zaino recuperà, a ogni modo (La storia xe  anbientà so on posto difarente de quelo dove chi'a  xe sucessa, sperando che la protezion del  Santo la serva a ritardare el pì possibile i efeti dela taresina so l'organismo, za malridoto, del sojeto).. E via. Ai sete rociatori ghe spetava oncora na cifra de Km de sfalto. 'Ndando suso la vejetazion se fasea senpre pì scarsa, fin quasi a sparire a tiro de 1.450 metri, dove che la spedizion se inbate so na specie de oasi in via de ...costruzion: on lagheto pesca ala trota, on prà tirà a spazola, zinque-siè cavai, spiazi par canper, quatro bronbare co bronbe speciali, on chioscheto e laùri vari in corso. Proprietà privata, a pagamento par tuti. A gratis sarìa massa belo.

L’oasi del Passo de Pierdarena

Fata aqua ala fontanela del'oasi, questa a gratis, vien dà ordene de rimètarse in viajo: chissà che la sfalto finissa ...ma dove xelo sto tornante ...e el sentiero? ...gheto sbalià strada, Mestro? Domande che vegnea dal cuore de tuti i concorenti, dala testa dela corsa ai ultimi inseguitori. Parole che pesava come na piera par el nochiero. "Ma qualo sbalià strada, eco a voi el tornante...", sbota el Mestro, che anca elo credea che ormai fusse pì vizina Rejo Emilia che Piaza al Serchio. El famoso tornante, quelo che la guida disea che da lì partia el viajo vero, el jera finalmente rivà. Par la contenteza Leonardo tira fora tre qualità de mandole che, fato el giro par la boca de tuti, le xe finie fin ca ti'o digo. Na marendina sbrigativa, fata pì par forza che par amore, ma senpre utile par la bigolara. Donca, desso taca el sentiero par la Montagna. Jera ora. On spetacolo, ben tegnù, salita da galantomani, faji, calche pin e, pì vanti, senpre manco vejetazion. L'aria sarìa sta fina se la natura no ghesse messo el zanpin. Chissà par qualo misterioso roejo o par quala stranba maledission o, forse, par qualo processo de desgorgo, prima Daniele, pò Claudio e dopo parfin anca Luigino i se dasea el canbio ala tronba. No le jera tute precise, però: pì seche quele de Claudio, pì sofegà, forse par retegno, quele de Luigino e pì mefitiche quele de Daniele che le restava sospese fin che quili de drio no le ghea snasà tute. "Na roba fra amghi", ga tentà de justificare Claudio. "L'amicizia orba la giustizia", ghe xe vegnù da sentenziare a Oscar, fra on aerosol e staltro. Ogni tentativo de  quili ciapà in mezo de alzare bandiera bianca, vegnea saludà da na solene supiada: parea che le tronbe de Gerico fusse sta risussità dala Bibia. Na piantajon de mirtili ga messo ala fine tuti in pace, anca Renzo e Oscar rivà al canpo dopo diese minuti, persi - ga dito ili - par vardare el panorama. No se savarà mai se i mirtili che ga magnà i du pori cristi i sia i stissi che staltri ghe ghea pena pissà dessora. Hasta siempre la nadura!

Ora Partenza          9.35

Ora arivo              18.15

Ore de sela            5.07

Tenpo totale           8.40

Totale Km.            53.7

Velocità max         48.3

Velocità media     10.5

Foradure               NO

Quota massima     1.800

Asfalto %                50

Sterato %                50

Piova (minuti)         4